كود سبور//

اكد الدولي المغربي منير المحمدي انه هو وصحابو فالمنتخب المغربي بقيادة الناخب الوطني وليد الركراكي، خدامين على كاس افريقيا 2025، وان الهدف ديالهم هو يربحوه ويفرحو المغاربة.

وهضر منير المحمدي وقال فتصريح للموقع الرسمي ديال الجامعة الملكية المغربية لكرة القدم: “هذا العام غايكمل بالخير وغانديو كوب دافريك، وهذا هو الهدف ديالنا، ملي كاتخدم على شي حاجة من بعد كتحصد النتائج وهذا هو هدفنا كفريق والأشياء الإيجابية كايجيبو الحوايج المزيانين”.

وكمل المحمدي: “خاصنا نوجدو لكلشي، وعندنا بطولة كبيرة (كأس إفريقيا) ومن شحال هادي كانحلمو نديو شي حاجة مع ليكيب ناسيونال وهذه البطولة غاتكون فرصة عندنا فبلادنا ومع الجمهور ديالنا نتمناو هذا العام يكون العام ديالنا”.

ووجه منير المحمدي ميساج للجمهور المغربي، وقال لهم: “انتوما ديما معنا وشكرا بزاف على التشجيع ديالكم لينا وحنا كانوجدو لكوب دافريك فبلادنا وباغيين نفرحو الجمهور ديالنا ونديرو شي حاجة كبيرة وبغيناكم تكونو معنا”.