كود المحمدية//

اهتز حي لا كولين بمدينة المحمدية، فليلة الجمعة-السبت 28/29 نونبر، على وقع جريمة مفجعة بعدما أقدمت أم على قتل ولدها اللي العمر ديالو 19 سنة داخل دارهم، فوسط شجار عنيف خرج عن السيطرة.

وحسب المعطيات المتوفرة، فالشجار بين الأم وولدها تطور بشكل خطير، بحيث استعملات فيه الأم عصا ديال لعبة “البيزبول” وجهات بها ضربات قوية لرأس الضحية، قبل ما تزيد تطعنو بسلاح أبيض (سكّين)، الأمر اللي تسبب فموته فبلاصتو. وبعدما تأكدات من أن ولدها فارق الحياة، قامت هي بنفسها بالتبليغ عند الشرطة على الجريمة اللي ارتكباتها.

ومباشرة بعد الإشعار، حضرات الوقاية المدنية وعناصر الأمن الوطني مرفوقين بفرقة الشرطة التقنية والعلمية، ودارو المعاينات الضرورية وفتحو تحقيق فملابسات الواقعة. وتم توقيف المشتبه فيها ونقل جثة الضحية لمستودع الأموات بمستشفى مولاي عبد الله من أجل التشريح الطبي.

المهم أن هاد الجريمة مازال الأسباب ديالها ودوافعها غير معروفة، والتحقيق كفيل بكشف الخيوط ديالها.