كود- كازا//

سالات هيئة الحكم اليوم الجمعة بغرفة الجنايات الابتدائية بمحكمة الاستئناف بالدار البيضاء، من الاستماع لسعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة، المتابع في قضية ما يعرف بـ “إسكوبار الصحرا”، ودابا جات نوبة المتهم الأخير عبد النبي بعيوي.

وخلال جلسة اليوم الجمعة، عطات المحكمة الكلمة لممثل النيابة العامة باش يوجه الاسئلة ديالو لسعيد الناصيري وهي اسئلة عندها علاقة بالفيلا المثير للجدل وامتى استلمها ودخلها، والأخير كان كايجاوب قبل ما يتدخل الدفاع ديالو للاحتجاج بداعي ان الاسئلة كاتعاود وديجا جاوب عليها هو ملي سولاتو هيئة المحكمة، لدرجة ان النقاش بين الدفاع والنيابة العامة ورئيس المحكمة سخن وهذا الشي اضطرّ القاضي باش يرفع الجلسة حتى تهدن الاجواء، قبل ما يرجعو يكملو واعتذر الدفاع وممثل النيابة العامة للمحكمة وليعضياتهم وكملو الجلسة.

سعيد الناصيري اللي جا كيف ديما انيق ومحسن وهاد المرة لابس تيشوط كحل وسروال نوار، كان كالعادة كايدافع على راسو بالحج والوثائق، وكاينفي التهم اللي موجهة له، ومع نهاية الجلسة وفكلمة مؤثرة طلب المسامحة من المحكمة واعتذر إلى كانت صدرت منو شي حاجة خلال الاستماع له وتفاعل معه الحضور فالقاعة بالتصفيق.

وقررت هيئة المحكمة تأخير أطوار محاكمة المتابعين في ملف ما يعرف بـ “إسكوبار الصحرا” حتى يوم 12 يونيو الجاي، باش تبدا الاستماع لعبد النبي بعيوي المتهم الأخير فهاد الملف.