كود – كازا ///

ذكرت مواقع إسبانية، أن المحكمة الوطنية ف مدريد وافقات، مؤخرا، على تسليم بارون مخدرات من تطوان للمغرب، بعدما هرب ف دجنبر 2019، قبل ما يتشد من طرف البوليس المغربي بسباب علاقتو ف تهريب كميات كبيرة ديال الحشيش عبر معبر ابني نصار.

وحسب المصادر ذاتها، تم توقيف هاد البارون بعد اعترافات متهمين آخرين حول الصلة ديالو بريزو كبير كيهرب الحشيش من المغرب ف اتجاه هولندا عبر التراب الإسباني عبر تصدير شحنات ديال الأثاث المغربي.

وف جلسة الاستماع اللي تعقدات لتقييم تسليمه، رفض المتهم تسليمو للمغرب. وشدد دفاعه على عدم وجود ضمانات قانونية حول نصوص المتابعة اللي جات ف مذكرة التسليم اللي قدمها المغرب. وأشار القرار الصادر إلى عدم سقوط الجريمة بالتقادم، مع الموافقة على تسليم المتهم اللي يتعين عليه تقديم دفوعه قدام محاكم المملكة المغربية.