كود الحديدة//

أكدات محكمة الاستئناف الإدارية فالرباط، أخيرا، واحد الحكم ابتدائي كانت المحكمة الابتدائية الإدارية فكازا، واللي بجوج رفضو دعوى العزل اللي ترفعات ضد النائب الجماعي عن حزب الاتحاد الاشتراكي علي شيبوب، نائب رئيس جماعة الجديدة اللي كيرأسها الاستقلالي جمال بنربيعة، من بعد ما سعات بعض الجهات لتجريدو من العضوية، وهي المهمة اللي كان تكلف بيها العامل السابق امحمد العطفاوي، اللي قضى في الجديدة شهور قليلة قبل ما يمشي والي لوجدة .

القضية بدات ملي عامل إقليم الجديدة قدم طلب العزل بناء على مراسلة جاية من رئيس الجماعة وتقرير أولي من المجلس الجهوي للحسابات، كيقول بلي كان شي ارتباط قديم بين نائب الرئيس علي شيبوب وشركة كايدعى أنها كتتعامل مع الجماعة، وهادشي يمكن يشكل تضارب فالمصالح.

لكن المحكمة وضعات النقط على الحروف، ووضحات فالحيثيات ديال القرار ديالها أن الوثائق اللي تقدمو قدامها كتبين بوضوح أن علي شيبوب قطع أي علاقة مهنية ولا مالية مع الشركة منذ 2014، يعني قبل بزاف من توليه لمهامه فالجماعة، او دخولو للمجلس الجماعي.

المحكمة اكدت في قرارها أن المعطيات الحالية ما كتثبت حتى وجود تضارب مصالح، وما كاين حتى دليل بلي شيبوب دار شي حاجة مخالفة خلال الفترة اللي كان فيها نائب رئيس.

وبناء على هاد المعطيات، قررات محكمة الاستئناف الإدارية رفض طلب العزل وتأييد الحكم الابتدائي، اللي كان حتى هو فصالح النائب الجماعي، من بعد ما قضى برفض طلب العزل ديال عامل الجديدة السابق.