الرئيسية > آش واقع > المحامي حاجي ل”كود”: بن عبد السلام أشاد بحملة “اللطيف” بالدعوة للصلاة والتكبير وبالتزامن مع الفترة اللي دارت فيها
23/03/2020 18:00 آش واقع

المحامي حاجي ل”كود”: بن عبد السلام أشاد بحملة “اللطيف” بالدعوة للصلاة والتكبير وبالتزامن مع الفترة اللي دارت فيها

المحامي حاجي ل”كود”: بن عبد السلام أشاد بحملة “اللطيف” بالدعوة للصلاة والتكبير وبالتزامن مع الفترة اللي دارت فيها

عفراء علوي محمدي- كود//

الشيخ رضوان بن عبد السلام ناض ففيديو كيستنكر رفع دعوة قضائية من طرف محامين وجمعيات حقوقية ضدو، بعدما اتهموه بتحريض الناس على الخروج في مجموعات للتهليل والتكبير، فالوقت اللي المغرب داير حالة طوارئ صحية عامة، ومايمكنش للناس يخرجو من ديورهم إلا بإذن من أعوان السلطة.

فردو على الفيديو اللي سجل الشيخ رضوان، قال الحبيب حاجي، وهو محامي من ضمن المحامين اللي دارو شكاية للنيابة العامة ضد المعني بالأمر، بللي خونا كان دار فيديو قبل و”كان شجع فيه الناس باش يخرجو، لكن كان خاصو يكون مضبوط فكلامو، حيت هو عندو متابعين، و كيقول بللي هو مشهور وكلمتو مسموعة، إذن كان خصو يبان من قبل ويقولو للناس يكَلسو فدارهم، ماشي يحرضهم على ذكر الله بطرق يعرضو بيها الصحة العامة فالبلاد للخطر”، على حساب هضرتو.

ووضح حاجي، فتصريحو ل”كود”، بللي بن عبد السلام لعب على الحبلين، واستغل الفترة إلى تدارت فيها الحملة باش يزيد يحرض عليها، وزاد: “هو شاف الحملة ديال الخروج، وماقالش خاصها توقف وخاص الناس يدخلو لديورهم، لكن ناض ففيديو يقول خاصنا نصليو ونكبرو، وهذا كان تشجيع للحملة ودعاية ليها وإشادة بيها.

وأكد بللي النيابة العامة غادي تحلل مضمون فيديوهات بن عبد السلام، وغاتستنتج واش ساهم فعلا فالتجييش ولا لا، أما “باش يجي من بعد وتقول للناس يكَلسو فديورهم، فهذشي مغادي يبدل والو، حيت الجريمة تدارت، وهذ القوالب والدوخان ديال المتحايلين ماغاتنفعش، حيت القانون لا يعرف التحايل”، كيف كيقول.

واعتبر حاجي بللي هذ النوع من الخوانجية عندهم الربح إلى الناس خرجو وخالفو أوامر الداخلية، حيت باغيين يطيحو النظام ويديرو دولة الخلافة، ويتصيدو أي لحظة باش يوصلو لهذ الهدف.

وللإشارة، وجهو مجموعة من المحامين والجمعية المغربية للدفاع عن حقوق الإنسان شكاية اطلرئيس النيابة العامة، من أجل متابعة كل من رضوان بن عبد السلام وأشرف الحياني والمنشد التطواني، وتاهموهم بتحريض المواطنين من اجل الخروج للشارع وخرق حالة الطوارئ الصحية.

موضوعات أخرى