كود – وكالات//

توفى فباريس، على 97 عام، المحامي الفرنسي موريس بوتان، اللي تزاد فمكناس، واللي ارتابطات سميتو لأكثر من 60 عام بقضية اختطاف واختفاء المعارض المغربي المهدي بن بركة.

عائلة بن بركة علنات، الأحد 9 غشت 2026، على موت بوتان، وعبّرات على الحزن ديالها لرحيل واحد السيد اللي ماكانش غير المحامي التاريخي ديالها، ولكن كان حتى صديق قريب للعائلة وكيعتابروه بحال خوهم.

بوتان بدا كيدافع على عائلة بن بركة مباشرة من بعد اختطاف المهدي بن بركة فباريس نهار 29 أكتوبر 1965، وحسب العائلة، بن بركة كان حتى هو موصي خواتاتو يمشيو لبوتان إلا وقع ليه شي حاجة.

ومن بعد، واصل المحامي الفرنسي الدفاع على القضية، خصوصا من بعد ما تقدمات العائلة  1975 بشكاية على الاختطاف والاحتجاز والقتلز،وبقى بوتان لسنين طويلة كيقلب على الحقيقة، وكيعاون قضاة التحقيق، وكيبحث على الشهود، وكيواجه العراقيل السياسية اللي كانت كتعرقل التحقيقات.

وبوتان كان مرتبط بالمغرب بشكل كبير، حيث خدم محامي فمرحلة الحماية الفرنسية ودافع على عدد من الوطنيين، ومن بعد الاستقلال واصل الدفاع على عدد من الديمقراطيين.