عمر المزين – كود///

عرفات المبادلات الخارجية فالفصل الثالث من عام 2025 ضغط واضح على النمو الاقتصادي، بسبب الارتفاع الكبير فالواردات وتباطؤ الصادرات.

وطلع حجم الواردات ديال السلع والخدمات، حسب تقرير ديال مندوبية التخطيط، بـ15,3% مقابل 11,1% نفس الفترة ديال 2024، وساهمات بشكل سلبي فالنمو بـ7,7 نقط بدل 5,8 نقط السنة اللي فاتت.

فالمقابل، الصادرات عرفات تباطؤ، بحيث نزل معدل النمو ديالها من 10,1% لـ8,2%، وما ساهمات غير بـ3,4 نقط فالنمو، بعد ما كانت 4,3 نقط.

وبهاد المعطيات، ولات المبادلات الخارجية تساهم بشكل سلبي فالنمو الاقتصادي بـ4,3 نقط فالفصل الثالث ديال 2025، مقابل مساهمة سلبية أقل اللي كانت فحدود 1,5 نقطة نفس الفصل ديال العام الفايت.