كود – وكالات//

العاصمة الألمانية برلين اعتمدات سياسة كتعطي الحق العيالات باش يعومو بصدرهم عريان فلابسينات العمومية بكل حرية بحالهم بحال الرجال ،هاد القرار كان جا كخطوة لمنع أي شكل من أشكال التمييز القائم على الجنس.

هاد التحول الإيجابي كان جا من بعده بدا شكاوي ديال مواطنات طالبو بالمعاملة العادلة والمساواة ف استخدام المرافق العامة، المسؤولين ف برلين تفاعلو دغيا وبشكل حضاري مع هاد المطالب، وأكدو بلي القواعد خصها تطبق على الجميع بنفس الطريقة بغض النظر عن الجنس، هاد القرار تيعكس وعي كبير وتطور ف طريقة التعامل مع حقوق الأفراد، وكيبين أن القانون ف برلين كيحمي كرامة وحرية كاع المواطنين .

بزاف د الناس والحقوقيين استقبلو هاد القرار بفرحة كبيرة واعتبروه خطوة إيجابية الىغ الأمام، المؤيدين كيشوفو بلي هاد القرار تيحيد النظرة النمطية لجسد المرأة، وكتخليها تحس بالراحة والحرية ف فترات الصيف بحالها بحال أي مواطن آخر ،هاد الخطوة كتعزز ثقافة تقبل الآخر وكتمكن العيالات من ممارسة حقوقهن بكل ثقة وبلا خوف من التمييز أو الأحكام المسبقة كيقولو ناشطين.

متابعين كيقولو بلي برلين كتأكد مرة أخرى بلاصتها كعاصمة عالمية للانفتاح، التسامح، والحرية ،حيث المدينة بينات بلي قادرة تطور القوانين ديالها باش تضمن راحة وسعادة كاع الساكنة والزوار، وكتعطي مثال حي ف التحرر الفكري والمساواة الفعلية اللي كتخلي كل فرد يعيش حياتو بسلام وأريحية.