احمد طيب – كود الرباط//

هاذ الشي ديال تدبير مجالس الجهات فالمغرب فيها بزاف ديال الممارسات اللي خاصها التدقيق و المساءلة حول جدوى صرف المال العام فعدد من الأمور.

مثلا جهة الرباط سلا القنيطرة، كارية واحد المقر ديال وكالة تنفيذ المشاريع بـ 16 مليون للشهر. العقار اللي مكري هو عبارة على عمارة صغيرة من اربع طوابق مجموع المساحة ديالها كاملة هو 400 متر مربع.

هاذ وكالة تنفيذ المشاريع اللي كارية هاذ المقر بـ 16 مليون للشهر، تأسست فعهد المجلس السابق، وحتا كراء المقر ديالها تم فعهد المجلس السابق اللي كان كيترأسو عبد الصمد السكال من البيجيدي، ولكن هذا ماشي مبرر باش يبقى هاذ الهدر ديال المال العام.

هاذ المقر تكرا ب 16 مليون وباش يبرروا هاذ المبلغ هزوا مكاتب الطابق الأول بالجهة وجابوهم لمقر وكالة تنفيذ المشاريع من أجل تبرير هاذ المبلغ وصافي.

اش كدير هاذ وكالة تنفيذ المشاريع اللي تأسست وعينو فيها موظفين وكراو ليها مقر. هذا سؤال خاصو جواب من طرف الرئيس الحالي رشيد العبدي و المجلس ديالو بعد ما دوز عامين ونص على رأس هذا المؤسسة.

هذه الوكالة عطاها القانون بزاف ديال الامكانيات لكن من واجب مدبري الشأن الجهوي يحققوا التناسب بين ما يصرف من اعتمادات وما يحقق من إنجازات باش ميبقاش صرف المال العام من أجل الصرف فقط دون حسيب أو رقيب.

استمرار كراء هاذ المقر بـ 16 مليون للشهر، رغم أن الجهة و إلى حدود يناير 2024 خسرات مليار و1152 مليون سنتيم معندوش مبرر، خاصة أن بعض المقرات غي مسدودة بالجهة، بحال مقر شركة عين جوهرة اللي واخذة فضاء كبير غي مسدود وهي من المفروض تنتقل لمقر الشركة بسيدي علال البحراوي باش تخدم مع الزبناء عن قرب.