كود الرباط//

يبدو ان شعار عدد من وزراء هاد الحكومة، هو “المال السايب كايعلم التبذير”.

اخر نموذج على الوزراء لي خدامين بهاد الشعار هي وزيرة الانتقال الطاقي والتنمية المستدامة، ليلى بنعلي، لي ماعارفاش اشنو مهمتها بالضبط فالحكومة، واش تجيب استثمارات فالقطاع الطاقي فالبلاد، ولا تبقا تدخل وتخرج فالهضرة كلما وجهت لها اسئلة حول أسعار المحروقات.

طبعا هاد الوزيرة من النهار الاول ليها فالحكومة بعد التعيين، وهي تالفة حيت سولات واحد المرافق كان معاها اشناهو حزب الأصالة والمعاصرة لأنها سمعت بانها غاتكون وزيرة باسم هاد الحزب.
وزادت تلفات بعد شي صورة قالو عليها انها ديالها مع شي واحد من استراليا، الوزيرة مانفات ما اكدات، لانها معندها علاقة بالسياسة ولا بالتواصل.

هاد لا علاقة لها بالتواصل كتزيز تبان هاد ليام لان شي جمعية عارضة عليها لشي لقاء مع الصحافة فشي اوطيل، والأصل ان الجمعية لي منظمة هي لي غادي دير الإعلانات والدعوات، لكن الوزيرة بنعلي لي مزالا ماقدراتش تعين كاتب عام فالوزارة ديالها، فتاو عليها صحاب الهموز تدير دعوات مأنتكة على حساب الوزارة بحال لي كايتدارو عادة فبعض المناسبات وبعض انشطة الوزارة.
وطبعا لي رابح هو مول المطبعة ولي كايتعامل معاه فالوزارة.
والحقيقة ماكاين حتا مبرر لصرف المال العام على دعوات ديال لقاء منظماه جمعية.
واشنو غاتقول بالسلامة هاد الوزيرة فهاد اللقاء؟