عمر المزين – كود///

بالرغم من وضعها في موقع إلكتروني يسهل عملية شرائها من طرف مشجعي “أسود الأطلس”، تسيطر حاليا السوق السوداء على جميع تذاكر المنتخب الوطني المغربي أمام نظيره التونسي، المقررة يوم الجمعة 6 يونيو 2025.

اللجنة المنظمة للمباراة الودية المذكورة أعلنت في وقت سابق أن المقابلة ستلعب بشبابيك مغلقة، وذلك بعد نفاد جميع التذاكر التي تم طرحها مسبقا، لكن الكل كيسول على كيفاش تسالاو، وشنو واقع بالضبط.

العثور على تذاكر هاد الماتش الودي رجع دبا مستحيل حقاش عدد من السمسارة شراو هاد التذاكر انهار كيف تحطو في موقع “ويبوك” المخصص لبيع هاد التذاكر. وكانت عندهم هواتف نقالة وحواسيب مخصصة لهاد الغرض باش يشريو بالزربة كولشي.

وكيف شافت “كود” أن تذاكر الدرجة الثانية المعروضة للبيع من طرف اللجنة المنظمة للمباراة بملغ 100 درهم وصلات دبا ف السوق السوداء لـ500 درهم للتذكرة الواحدة، مقابل 1500 درهم لتذكرة المنصة الشرفية (VIP) اللي ف الأصل كتدير غير 600 درهم.

أما تذاكر الدرجة الثالثة اللي تحطو للبيع بمبلغ 70 درهم، فإن هاد السماسرة كيبيعوها دبا ف السوق السوداء بين 300 درهم و400 درهم للتذكرة الواحدة.

وندد بوعزة الخراطي، رئيس الجامعة المغربية لحقوق المستهلك، في تصريح لـ”كود”، لوجود ما أسماهم بـ”الشناقة” في جميع الميادين، ومنها ميدان قطاع الرياضة.

وطالب الخراطي من الجامعة الملكية المغربية لكرة القدم باش تفتح شبابيك في جميع المدن لإبطال وإسقاط عمل هاد الشناقة، وإلا سيصبح المستهلك عرضة لما يعيشه حاليا في طلب الحصول على الفيزا.