كود سبور//
خدام المارشي نوار تاني قبل ماتش الرجاء الرياضي واتحاد التواركة اليوم الاحد فستاد دونور، برسم الدورة 4 من البطولة الاحترافية لكرة القدم.
وحسب ما عاين موقع “كود” فدورة دارها حدا ملعب المركب الرياضي محمد الخامس، فالمارشي نوار خدام وتذاكر المباراة بين الرجاء والتواركة مجودة فالسوق السوداء.
الطلب كاين على التذاكر فهذا الماتش، وجماهير الرجاء كتشري فالتذاكر اللي خارج ثمنها بمبلغ 50 درهم ووصلت إلى 80 و100 درهم، واللي خارجة بـ120 درهم وصلت إلى 150 درهم.
اللي كيبيعو وكيشريو فالمارشي نوار فهاد الماتش ناشطين، والحركة عندهم دايرة مزيان، وكل ما بان شي واحد فيهم وتعرف أنه كيبيع التيكي كيتجوقو عليه الرجاويين اللي باغيين يقطعو باش يدخلو يتفرجو فالمباراة.