وكالات//

تحكمات واحد المرا من كاليفورنيا بـ الحبس ما بين 15 عام حتى مدى الحياة، بعدما تتابعت بتهمة أنها دارت حقن بطريقة غالطة تسبّبات فموت الممثلة سينديانا سانتانجيلو.

المحكمة العليا ديال مقاطعة لوس أنجلوس هي اللي نطقات بالحكم، بعدما تْدانات ليبي آدام فشهر أكتوبر بتهمة القتل من الدرجة الثانية، حسب ما قالت جريدة لوس أنجلوس تايمز.

الممثلة سانتانجيلو اللي شاركت فمسلسلات بحال متزوجون ومسرح الجريمة، ماتت وعندها 59 عام فشهر مارس اللي فات، مباشرة من بعد ما خذات حقن ديال السيليكون من عند آدام.

آدام اللي عندها 55 عام تْدانات حتى هي بـ ممارسة الطب بلا رخصة، حيت حقنات سانتانجيلو بزيت السيليكون، وهاد الشي دار انسداد خطير فالشرايين ديالها وماتت بسبّبو، على حسب ما قال الادعاء اللي اعتمد على الرسائل اللي كانت بيناتهم، وفق قناة ABC 7.

المحامي ديال الدفاع قال بلي آدام ما دارتش الحقن براسها، غير قدّمت استشارة، ولكن الأدلة بيّنت العكس.

وزيد على هاد الشي، آدام كانت تْدانات قبل فـ2024 بـ القتل غير العمد حيت كانت عطات حقنة سيليكون قاتلة لشابة سميتها كاريسا راجبول فـ2019، وحتى بنتها أليشيا غالاز تحكمات معاها. فديك القضية خداو 3 سنين ديال الحبس وتطلقات فالموعد المحدد.