كود طنجة//

علمت “گود” من مصدر مطلع بلي كاين غليان فأعضاء حزب التراكتور بمقاطعة طنجة المدينة للي كيتساءلو كيفاش تم الإقصاء ديالهوم من المسؤولية فالمكتب ديال مجلس المقاطعة، خاصة وأن الأحرار دارو ميسة، خداو جوج نواب من أصل ثلاثة، والمقعد الثالث خداه الاتحاد الاشتراكي.

المعطيات الموثوقة للي جابت “كود” تؤكد أن الليموري عرف باللي حميد أبرشان حسم الرئاسة ديال المقاطعة بتحالف كيضم الاتحاد الدستوري والاتحاد الاشتراكي والعدالة والتنمية بالإضافة إلى دخول أكبر فريق فالمقاطعة للي كيمثلو حزب الأحرار، هاد التحالف غادي يقلب التوازنات داخل مجلس المدينة.

ولذلك مين شاف الليموري أن القضية غادي تقلب عليه بقى متشبث بمقعد فالمكتب ديال المقاطعة، دار جلسة مغلقة مع أبرشان وبنجلون انتهت باتفاق يقضي بسحب الليموري مطلب التمثيلية فالمكتب مقابل الإبقاء على الدعم ديال الليموري فرئاسة الجماعة، وهنا كود كتذكر بالتحذير للي كان دارو ابرشان قبل أيام موجه للتراكتور، وفيه أبرشان هدد بنسف الأغلبية داخل مجلس المدينة إذا تمت عرقلة انتخابو كرئيس للمقاطعة.

دابا الليموري بقى وفي للأسلوب ديالو أنا ومن بعدي الطوفان، مين شاف الطرح سخون ما ترددش لحظة باش يبيع فريق حزبو غير باش يضمن البقاء ديالو..

وهاد الأنانية معروف بيها الليموري، سبق دارها فمجموعة الجماعات ديال جهة طنجة تطوان الحسيمة المكلفة بتدبير قطاع الماء والكهرباء حين فرض راسو المرشح الوحيد بلا ما يخبر أعضاء حزب التراكتور بطنجة وبلا ما يستاشر مع القيادة بما فيهوم بنت الباشا براسها.

الناس ديال البام  فطنجة صبحو مقتنعين أنه اذا ما كانش تدخل مباشر ديال بنت الباشا فأسرع وقت فإن الليموري غادي بالتراكتور للحيط وغادي يشتت الحزب فالانتخابات الجاية.