كود – سيدي سليمان //

قدرو باحثين مغاربة وفرنسيس وصبلون يكتاشفو معالم أثرية جديدة فموقع “ريغا” القريب من سيدي سليمان، واللي كيرجع ليام الموريين والرومان، ولي من بينها حمّامات عمومية ومعمل قديم ديال الڤان.

هاد الخدمة جات فإطار مشروع علمي خدامين عليه سنين ولي كيقلب يفهم كيفاش كانت عايشة المنطقة قبل ومن بعد ما دخلو الرومان، الجديد هاد المرة هو التأكد باللي واحد البناية اللي كانت محسوبة غير صهريج ديال الما ،كانت فالحقيقة حمّامات عمومية كانو كيتستعملوها الناس ديال داك الوقت.

وزيد عليها، الباحثين لقاو حتى بناية متكاملة ديال صناعة الڤان حدا دار رومانية كبيرة،و لي محافظة على على التفاصيل ديالها، وخا أنها كانت تحرقات فواحد  الوقيتة.

كيف ما تلقى صنظوق كبير كيوري طقوس قديمة، واللي كيعطي فكرة على الجانب الديني والثقافي ديال السكان فداك الوقت.

ومن جهة أخرى فنفس البلاصة ، بان حي مورّي قديم مبني من بالطين، كيرجع لقرون قبل الميلاد، وكيبان أنه كان عامر بالحياة قبل ما يوصل الحكم الروماني.

الباحثين كيشوفو باللي هاد الاكتشافات غادي يعاون بزاف ففهم التاريخ القديم ديال المغرب، ويعطي قيمة أكبر للتراث الأثري اللي مازال فيه بزاف ما يتكتاشف.