سهام البارودي- كود//

ايه بصح الوضعية د المرا فالمغرب تحسنات فالسنين الأخيرة خصوصا مع مدونة الأسرة ! حتى واحد ماغادي ينكر انه الوضعية د الاسر عامّة تحسنات ! و مابقاتش ديك الضسارة و البسالة لي كانت شحال هادي ! شحال هادي راه كان الراجل كايتعشى مع المرا و يبات مايصبح ! كايطج و يسمح فيها و يسمح فستة د النفوس و يمشي يستقر فشي قبيلة اخرى و لا يمشي لطانطان و يضربها بتجويجة و يدير ولاد اخرين و يخلي المرا واحلة مع ولادو كاضرب عليهم الجفاف و كاتخدم عليهم فالجنانات فحالا غا بوحدها لي ولداتهم ! و الناس لي عايشين فالحومات الشعبية راه غايكونو عارفين شي مرا هجالة ساكنة حداهم “سامح فيها الراجل”
و نهار كاتكبر بنتو و كاتبغي تجوج كايقوليها العدول خاصك الولي الشرعي واسيري آحبيبتي قلبي على بّاك فطانطان و لا الزّاك و لا مولاي يعقوب باش يوافق ليك على الزواج واخا هوا ماكايسال فيك حتى زفتة !
و شحال هادي راه كانت المرا تقدر تكون جالسة ماعليها مابيها فدارها كاطيب شي طاجين و لا كاترقّع شي سروال مثقوب و لا كاطرز شي زواقة حتى يتم الراجل داخل و مدخل عليها الضرّة ! مشا هوا ضربها بتجويجة بلا خبار المرا ! بغات تقبل بالواقع مرحبا ! مابغاتش كايسيفطها لدار بّاها من بعد ماكاتكون ضيعات معاه شبابها و طاقتها و كايلوحها فحال شي كلبة !
هادشي كان ماشي ماكانش ! و العيالات لي كبار شوية فالسن يقدرو يعاودو ليكم بزاف د القصص د الجدات و الامهات و الخوالات و الجارات لي حياتهم تقلبات رأس على عقب حيت واحد النهار الراجل ضارت ليه فالخوا و قرر يطج و لا يضربها بتجويجة و لا يطلقها گاع و يلوحها للزنقة ! مآسي و أسر تشردات حيت كانت السيبة و الضسارة و المرا مغلوبة على امرها !

دابا لا ! دابا الحمد لله كاين سيدنا الله يخليه لينا مهلي فينا و كاين المخزن ! المرا ولات تاهي عندها حقوق كيما من ديما كانو عندها واجبات ! و القانون كايتعامل مع المرا كإنسان ماشي كبهيمة اي واحد يقدر يستعملها و يلوحها بلا عاقبة ! هادشي مزيان و بزاف و لكن حيت مازال كاينين نواقص فالمدونة سيدنا الله ينصرو بغا يطورها و يعالج المشاكل لي فيها ! خصوصا فحالات الطلاق لي المرا كاتكرفص فيهم بزاف لدابا !

الواقع و الارقام كايقولو هادشي و راه كانشوفو بعينينا كيفاش الاغلبية د المطلقات كايعيشو الرعب مورا الطلاق ! الراجل كاين لي عندو هري كايدخل الملاين و داير البيع وشرا و فاش كايوقف قدام القاضي كايجي مامحسّنش و فمو خانز و كايقوليه ماخدامش ا سيدي و لا كايديكلاري شي مدخول هزيل باش شنو ؟ باش ماتخرجش ليه النفقة كثيرة وا شوف دابا واش ماشي مايسواش هذا لي مستكثر النفقة على ولادو ؟! و هادو راه اغلبية الحالات ! النفقة قليلة ! و الراجل كايهز يديه على مسؤولية الاولاد و فحالة المرا بغات تسافر بالولد خاصها موافقة الطليق لي كايجرجرها عليها !
انا شخصيا كانعرف بنت مهندسة بغات تدي ولدها يقرى ففرانسا و الطليق ديالها عكّس ليها ماشي حبا فولدو ! طبعا لا حيت هوا اصلا ولدو ماكايشوفوش مامسوقش ليه ماكايصرفش عليه ماكايعيطش ليه فالاعياد ! غي زكارة ! سم ! حقد و صافي ! و هادشي علاش القانون خاصو يتبدل و يعطي الحق للحاضنة انها تاخد قرارات مهمة فحياة ولادها ! و تكون عندها الولاية !  باش هاد الضسارة د المصننّين تحبس ! و يتحقق العدل لي هوا الغاية الاسمى من اي تشريع !
و أخيرا و ليس آخرا
عاش سيدنا لي مهلي فينا