أسماء غربي – كود //

الدكتور المختص ف التجميل، الحسن التازي، مشا بعيد فهادشي تاع الشهرة، ومشا تزاحم مع الدراري صغار ف مسابقة Maroc Web Awards ديال هاد العام.

السيد مرشح ف مجموعة أحسن صفحة ديال فايسبوك رغم أ بزاف كيقولو بللي ماكيدير فيها حتى مجهود .. فقط كيهز تصاور ديال السيدات اللي دازو عندو ف الكابييني و دارو عمليات تجميل و كيلوحهم ف الصفحة ديالو، إيلا كان بنادم موافق مافيها باس.. و لكن كيقولو بعض المتتبعين أنه فالغالب كيدير هادشي بلا خبار صحابات/صحاب التصاور في خرق سافر لأخلاقيات المهنة و لخصوصية الأشخاص.

هادشي تاع مشاركة أطباء التجميل، خاصة، لتصاور “الكليان” ديالهم خاص يكون واضح و محدد و ما يجي أي واحد و يبدا يشارك تصاور الناس و خصوصا إيلا ما كانوش موافقين أو ما فراسهومش أصلا.. وهنا مسؤولية الأجهزة الوصية و منها هيآت و نقابات الأطباء.

https://www.instagram.com/p/CMeq9OuBBGM/?igshid=yvvso81cuh1t