كود الرباط//

مرة أخرى، يتأكد بلي للي واقفين مور گروب جين زيد 212 ف ديسكورد، كيستهدفو نجاحات المغرب ومؤسساته، وماسوقهمش لا ف الصحة ولا التعليم، فبعدما كانت مطالبهم اجتماعية موراها تحولات لسياسية واقتصادية عبر مخاطبة الملك مباشرة ودعوته إلى خرق الدستور بإقالة رئيس الحكومة، ثم الحرب الاقتصادية على شركات معينة في محاولة لاستهداف الاقتصاد الوطني. اليوم هاد الكروب علن فبلاغ بلي خاص المغاربة يقاطعو ماتش المنتخب مع الكونغو.

هاد البيان، جا مباشرة بعد فوزمنتخب جيل زيد على مريكان، ف كاس العالم الشيلي للمنتخبات أقل من 20 سنة، وتأهله التاريخي للدومي فينال. هاد الفرحة الزوينة وسط المغاربة كاملين معجباتش صحاب كروب جين زيد، للي تفرشو عاوتاني، وعلنو مقاطعة ماتش المنتخب الأول.

حركة ’’جين زيد 212” خرجت ببلاغ فـ الوحدة ديال الليل على سيرفر ديسكورد ديالهم، نشرو شي حد كيعرف راسو بـاسم Piwpiw، كيدعو فيه إلى مقاطعة الماتش، وهاد الشي خلق بزاف ديال علامات الاستفهام.

البلاغ بدا بكلمات الدعم للأسود، وقالو بأنهم كيتمنّاو التوفيق للمنتخب، ولكن من بعد قلبو الاتجاه وعلنو أن “الاهتمام بكرة القدم ما خاصوش يلهينا على قضايا الشباب والمعتقلين”، ودعاو الناس مايمشيوش للملعب، وسمّاو الخطوة “مقاطعة سلمية وواعية‘‘.

هاد النداء كيخلي أي واحد عاقل وغير عاقل يتساءل كيفاش هاد الحركة ولات كتحاول تخلط بين المطالب الاجتماعية والسياسية وتستهدف رمزية الكرة، اللي هي اليوم من أكبر النجاحات ديال المغرب، خصوصاً والمملكة كتوجد لاستضافة كأس إفريقيا 2025 وموراها مونديال 2030.

وهاد الشي كيعني أن البلاغ ما عندوش هدف ديال دعم المعتقلين بل هدف سياسي ورسالة موجهة فـ التوقيت الخطأ.

الملك فـ الخطاب ديالو الأخير قال بوضوح أنو ما خصش يكون تناقض ولا منافسة بين المشاريع الكبرى والبرامج التنموية، بمعنى آخر، ما يمكنش نضربو فـ حاجة كتجمع المغاربة وتفرحهم. يعني كيف نجحنا ف الكرة نفرحو وخاص نجحو فالتعليم والصحة ونفرحو.

بالتالي بان اليوم بوضوح أن بعض مكونات كروب “جين زيد” عندها أهداف أكبر من المطالب الاجتماعية، وبدات كتقرب من مناطق حساسة فـ الوعي الجماعي، على راسها الكرة، اللي بقات هي النجاح الوطني اللي ما خصوش يتم التلاعب بيه.

الكرة بعيدة على السياسة وعلى الحركات الاحتجاجية، كنهضرو على المنتخب الوطني لي كيجمع كولشي، المعارضة والأغلبية واليمين واليسار والإسلاميين والناس العاديين والكبير والصغير والرجال والعيالات ووو.

جين زيد فشلو يقتحمو ويستقطبو الإلترات بحال فرق الرجاء ولا الوداد للي عندهم أسلوبهم فالشعارات والمواقف والاحتجاج بالفم وحتى هوما ناضجين بزاف على هادو للي كيحركو جين زيد. دبا اللعب كيتفرش شويا بشويا.