كود سبور//

عبرو لاعبات المنتخب الوطني المغربي على الرغبة ديالهم فتقديم ماتش مزيان ضد أوغندا اليوم الثلاثاء، ضمن المباراة الودية اللي غتجمع المنتخبين، واللي كيستعدو من خلالها اللبؤات والمدرب فيلدا لإقصائيات الألعاب الأولمبية 2024.

وفتصريح لها قالت لاعبة المنتخب المغربي حنان أيت الحاج: “التداريب كتدوز فجو مزيان وكنستعدو لماتش أوغندا بجدية ونحاولو نكونو مركزين مزيان ونطبقو التعليمات ديال المدرب باش نكونو واجدين ونربحو المباراة وهادشي غيعطينا معنويات كبيرة للماتشات الجايين”.

وقالت روزيلة عيان: “الهدف من التداريب ديالنا هو نكونو موجدين مزيان لماتش أوغندا، وباغيين نديرو أداء حسن من الماتش الماضي ضد نفس المنتخب، والمعنويات مرتفعة وسط اللاعبات ومركزين ذهنيا على الرباح”.

وغيلعب المنتخب الوطني المغربي النسوي اليوم الثلاثاء فالعشية فتيران مولاي الحسن فالرباط، ثاني ماتش أميكال ضد أوغندا، بعدما كان لعب الماتش الأول ضد نفس المنتخب الجمعة الماضي وتعادل فيه بواحد لواحد.