كود سبور//

بداو لاعبات المنتخب الوطني المغربي كايركزو على كاس إفريقيا ديال العيالات، اللي غاتكون فالمغرب ما بين  5 و 26 يوليوز 2025، وأكدو انهم باغيين يربحو اللقب.

واستعدادا لمواجهة كل من تنزانيا الجمعة الجاي والسنغال الثلاثاء المقبل، قالت خديجة الرميشي حارسة مرمى المنتخب المغربي النسوي فتصريح للموقع الرسمي ديال الجامعة الملكية المغربية لكرة القدم: “كانوجدو بجدية الماتشات الوديين بجوج اللي جايين ضد تنزانيا والسنغال، باش نشوفو المستوى ديالنا فين واصل ونوقفو عند نقاط الضعف والقوة ديالنا ونخدمو عليها، باش من هنا لكاس إفريقيا نكونو واجدين ونشرفو الكورة الافريقية”.

أما الكابتان ديال المنتخب المغربي النسوي، غزلان الشباك قالت: “الاستعدادات ديالنا كاتدوز مزيانة وديما كانكونو فرحانين ملي كايعيطو علينا للمنتخب المغربي وباغيين نعطيو كل ما عندنا باش نمشيو بعيد بهذا المنتخب، ودابا كانوجدو الماتشات الوديين ضد تنزانيا والسنغالي اللي كانستعدو بهم لكاس أفريقيا اللي منظم عندنا فالمغرب وكانتمناو نربحوه، وباغيين نعطيو كل ما عندنا وتركيزنا كل دابا باش ما ضيعش منا ونفرحو بها الشعب المغربي اللي ديما كايشجعنا وباغي الكورة النسوية تطور فالمغرب”.