كود هناء ابو علي ////

فهاد كأس العرب اللي خاص تبدل ليه السمية ويولي كأس الدول الناطقة بالعربية وما جاورها، خداتو دولة قطر الصغيرة مناسبة باش تسوق فهمها للهوية. بلاطوات قنواتها من “الكاس” ل”بيين” ودوزو على الواليدة ديالهم “الجزيرة” كلهم كيركزو على الهوية الاسلامية العربية. شي وحدين خلقو كونسيبت “عرب افريقيا” و”عرب اسيا”. طبعا هاد الشي كيحركو الفكر الاخواني اللي كترعاه دولة قطر. هاد الدولة اللي هاجماتنا قبل ايام عبر حسابات وهمية ف”اكس”.

هاد الدويلة خصصات 7.1 مليون دولار للفائز بالكاس اللي كان المغرب. فلوس كثيرة ماشي على قبال الكورة. هاد الدويلة ما هامها لا كأس العالم ولا غيرو. هدفها الاساسي تسويق نموذجها المجتمعي الاخواني. رعات هاد النموذج سياسيا واقتصاديا فالربيع العربي. باش فشل فمصر وتونس والسودان وليبيا وباش حصلات فالخليج وتحاصرات، خدمات الكورة قوة ناعمة. وظفاتها لتسويق نموذجها للي رجعنا كمغرب دولة “عربية اسلامية”

جابو امثال ابو تريكة من مصر وجمال صطايفي من الجزائر وشي متخلفين من المغرب باش يرددو داك التخربيق. دخلو حتى للعابة هاد الفكرة. شفنا ولد اسفي عبد الرزاق حمد الله خارج كيقول “ما كاينش عرب افريقيا وعرب اسيا” حنا كلنا عرب. شكون قالها ليك. منين جبتيها. اش من دراسة علمية اعتمدتي يا السي العاليم.

المغرب ما عمرو كان “عربي”. تاريخيا راه امازيغي. هاداك الاسلامي ديال المقرئ ابو زيد خرج كيقول باللي هو حفيد مولاي ادريس، يمشي يرجع للشرق. اش كيدير فالجديدة. طبعا كيقولها غير مزايدة. نتحداه هو وغيرو باللي عربي. ينوض يدير “ا دي ان” باش نعرفو الاصول.

نبدا من راسي. ديما كيكذبو علي باللي عربي. قررت ندير “أ دي إن” وكانت النتيجة ان 69 بالمائة امازيغ. الباقي مفرق من الشرق الاوسط وايطاليا. لا علاقة للعرب. عليه راه المغرب مغرب. امازيغي. افريقي. فيه جينات عربية واوروبية.

قطر واعلامها كيوهمونا بامور ماشي صحيحة. كيسوقو لكذوب. الجميل فالبلاد هو تيار بدا ياخذ بلاصتو فيه المؤرخ والمثقف واللغوي والسياسي كيدافع على التمغرابيت. على الخصوصية المغربية. على اننا ماشي عرب. كاين اللي كيتكلم لغة قريبة للعربية ولكن ماشي عرب.