گود سبور//

تحل مشكل اللاعب البرازيلي اللي جا لرجاء بني ملال ويفرسون دي أوليفيرا باتيستا، ولقى راسو حاصل فمدينة بني ملال لحوالي 21 يوم، بلاما يوقع مع الفريق، وما قادرش حتى يرجع لبلادو حيث الباسبور ديالو حيدوه له النادي حسب المحامي ديالو.

وتواصلات “گود” مع اللاعب ويفرسون دي أوليفيرا باتيستا، باش تعرف الوضع ديالو فين وصل، وأكد أن المشكل ديالو مع رجاء بني ملال تحل، وقال في تصريح لـ”كود”: “أنا دابا بخير، وما بقاش عندي الخوف، راه رجعو ليا الباسبور ديالي وغدا غادي مسافر”.

وبهذا كايكون هذا فيلم الرعب سالا ديال هذا اللاعب البرازيلي الشاب اللي جا على قبل أنه يلعب مع فريق رجاء بني ملال، حتى لقى راسو واحل فوطيل بمدينة بني ملال بلا باسبور وما عندوش باش يشري الماكلا.