كود سبور//

دخلو اللعابة ديال اتحاد طنجة اليوم الاثنين، في إضراب وهذا الشي قبل من الماتش المهم اللي عندهم أمام الرجاء الرياضي برسم الدورة 26 من البطولة الاحترافية لكرة القدم.

وحسب مصدر مطلع، فاللاعبين د اتحاد طنجة ما بغاوش يديرو الحصة التدريبية د اليوم، هذا الشي حيث ما توصلوش من إدارة النادي اللي كيترأسها محمد الشرقاوي بمستحقاتهم.

نفس المصدر، كشف أنه كاين فاللاعبين اللي كيتسال شهرين من المستحقات باقي ما خداهاش، بالإضافة إلى بريمات شي ماتشات فاتو.

وكيصارع اتحاد طنجة من أجل البقاء ضمن القسم الوطني الأول، وأي حادث بحال هذا يقدر يؤثر على الفريق في هذه المرحلة الصعيبة اللي كيعيشها، خصوصا وأن الموسم قريب يسالي.