گود سبور//

كشف الاتحاد الإفريقي لكرة القدم على أحسن تشكيلة فكوب دافريك ’’الكوت ديفوار 2023‘‘، وما فيها حتى شي لعاب من المنتخب المغربي اللي ودع البطولة من ثمن النهائي، وفيها الكونگولي شانسيل مبيمبا اللي كان وقع بينو بين الناخب الوطني وليد الركراكي مشكل فالدور الأول.

واختار الاتحاد الإفريقي لكرة القدم، أحسن تشكيلة فلاكوب دافريك وفيها 11 لاعب، هم الگول الجنوب إفريقي ويليامز، والنيجيري أولا إينا، والمواطن ديالو تروست إكونگ، الكونگولي شانسيل مبيمبا، والإيفواري شيسلان كونان.

وكاين الجنوب إفريقي ماكوينا، والإيفواري ميشال سيري، والمواطن ديالو فرانك كيسي، والكونگولي يواني ويسا، وإيميليو نسوي من غينيا الاستوائية، والنيجيري لوكمان، أما أحسن مدرب فهو أمريس فاس مدرب الكوت ديفوار اللي بدا كوب دافريك كمدرب مساعد وسلاه كأحسن مدرب، حيث قاد الكوت ديفوار للتتويج باللقب، بعدما دروه مدرب مؤقت ملي جراو على المدرب الفرنسي گاسيي حيث كانوا غيتقساو من الگروبات.