كود سبور//

غادي يتحرم منتخب الكونگو الديمقراطية من المشجع ديالو الأيقونة د كاس افريقيا 2025، ميشيل كوكا الملقب بباتريس لومومبا، وما غاديش يقدر يكون حاضر لتشجيعو فماتش الباراج المؤهل لكاس العالم 2026، ضد منتخب جاميكا فالمكسيك غدا الثلاثاء.

وأعلن المشجع “باتريس لومومبا” اليوم الاثنين انه ما غاديش يكون حاضر فهاد الماتش باش يشجع منتخب بلادو الكونگو الديمقراطية ضد المنتخب الجاميكي، بسبب صعوبة الحصول على تأشيرة الدخول للمكسيك.

ووضح “باتريس لومومبا” انه دار محاولات للحصول على الفيزا ديال المكسيك ومشى حتى لكينيا وإثيوبيا باش يقدر ياخد الفيزا، ولكن الاجراءت كانت صعيبة والوقت ما بقاش له، داكشي علاش قرر يرجع لكينشاسا باش يشجع المنتخب ديالو من بلادو.

وكان ميشيل كوكا المعروف بزعيم الكونگو الديمقراطية التاريخي باتريس لومومبا، تشهر بزاف فكاس افريقيا 2025 فالمغرب، وفحوار له مع “گود” كان شرح كيفاش جاتو الفكرة يتقمص هذه الشخصية فالتيارانات خلال ماتشات الكونگو الديمقراطية، وكان عبر على الحب ديالو للمغرب وللمغاربة وشكرهم بزاف على حسن الاستقبال والضيافة.