كود سبور//
قربو الكوكب المراكشي يطلعو للقسم الاول من البطولة الاحترافية، واخا تعادلو اليوم فمراكش مع رجاء بني ملال برسم الدورة 28 من بطولة القسم الثاني بنتيجة زيرو لزيرو، ورفع الفريق المراكشي الرصيد ديالو إلى 51 نقطة، وبالمقابل ولات عند رجاء بني ملال 47 نقطة، والمراكشيين خاصهم يربحو الماتش الجاي او يتعادلو الماتشات بجوج اللي باقيين لهم باش يطلعو.
تعادل رجاء بني ملال خلالهم يوصلو على يعقوب المنصور اللي كاينين فالمركز الثاني واللي خسرو مع النادي القنيطري فنفس الدورة ونفس التوقيت، بنتيجة واحد لزيرو، والرابطيين بقات عندهم 47 نقطة، اما النادي القنيطري ولات عندهم 32 نقطة وصوفاو من الطيوح للهواة.
أما اولمبيك الدشيرة صحاب المركز الرابع ربحو اولمبيك خريبكة بنتيجة 3-2، وولات عند السوسيين 46 نقطة ومحتلين المركز الثالث ورا يعقوب المنصور وبني ملال، والخريبكيين ولات عندهم 27 نقطة ومحتلين المركز 15.
