كود سبور//

كاتزيد تكبر المعاناة ديال الكوكب المراكشي اللي مضطر يستقبل الماتشات ديالو خارج المدينة الحمراء، حيث التيران الكبير لمراكش فيه الإصلاحات، وهاذ المرة غايمشي يستقبل الوداد الفاسي فمدينة بنجرير وبلا جمهور.

وقررت السلطات المحلية لمدينة بن جرير، اليوم الاربعاء خلال الاجتماع الأمني التنسيقي اللي كايسبق ديما الماتشات، يتلعب الماتش بين الكوكب المراكشي والضيف ديالو وداد فاس برسم الدورة الخامسة بطولة القسم الثاني فتيران بنجرير الاحد الجاي بلا جمهور.

وتأثر الكوب المراكشي بزاف من استقبال الماتشات خارج التيران ديالو، لا رياضيا ولا ماديا، والفريق يحتل المركز 13 برصيد 3 نقاط بعد مرور 4 الدورات، واللي شاف الوضع ديال الفريق ما يقولش أن هذا هو النادي الأول لمدينة سياحية وبإمكانيات مهمة بحال مراكش، مع العلم أن الماتشات اللي فاتو استقبلهم الفريق فمدينة الزمامرة.