كود سبور//

خرجو الكوكب المراكشي كيتشرطو على الصحافيين باش يحددو شكون المنابر الإعلامية، اللي غيخليوها تحضر الماتش الجاي ديال الفريق ضد وداد فاس، للي غيتلعب اليوم الأحد، ضمن منافسات القسم الثاني من البطولة الاحترافية، ولكن طلعو ما فاهمين والو.

اللجنة ديال التواصل مع الإعلام فالكوكب المراكشي بغاو يديرو فيها مطورين باش يديرو حد للمنتحلين لصفة صحافي، من صحاب ليبادج ديال مواقع التواصل الاجتماعي والمتطفلين على مجال الإعلام وغيرهم، وهذا الشي مزيان، ولكن المشكل هو الفقيه اللي كنتسناو براكتو دخل للجامع ببلغتو، وقالو الكوكب فبلاغ لهم أن الصحافيين اللي باغيين يغطيو الماتش، خاصهم يدليو للنادي ببطائق الصحافة ديال وزارة الشباب والثقافة والتواصل، وبهذا الإعلان كيكونو الكوكب المراكشي هما اللي كينشرو الإشاعة، أو ما فاهمين والو فالإعلام وخا هذا مشكل آخر ثاني، واخا نورمالمون عندهم لجنة ديال الإعلام والتواصل ولكن بان بلي بحالهم بحال بزاف المتداخلين اللي كيتعاملو مع الصحافة، غير داوين وصافي وما فاهمين والو فالإعلام الوطني وشكون المؤسسات اللي مأطراه.

الغريب فالأمر هو أن الكوكب اللي دايرين فيها واعرين وباغيين يفرضو الشروط على الصحافيين باش يدخلو للتيران، كيقولو أن الصحافي اللي باغي يحضر الماتش خاصو يدلي ببطاقة وزارة الشباب والثقافة والتواصل، وهاد الوزارة ما شي هي اللي كتعطي البطائق للصحافيين حاليا، حيث آخر مرة عطات الوزارة البطائق للصحافيين المهنيين كانت عام 2018، وما بقاتش مسؤولة على هذا الشي، وحاليا ومن عام 2019، والمجلس الوطني للصحافة هو اللي من المهام ديالو منح البطائق المهنية للصحافيين، والغريب فالأمر أن حتى لو قلنا أنه ربما وقع سهو فالبلاغ ديال الكوكب جبد ثلاثة ديال الهيئات أخرى تمنح بطائق للصحافيين الرياضيين وماجبدش المجلس الوطني للصحافة اللي كينظم مهنيا الصحافة عموما.