كود سبور//
وصلو الكوكب المراكشي اللي هو أكبر فريق فمنطقة الحوز اللي ضربها الزلزال الجمعة الماضي، (وصلو) غير دابا باش يعطيو الدم بالمدينة الحمرا، اللي جاو لها اليوم الاحد من الرباط، حيث كانو غيلعبو ماتش تما قبل ما يتأجل بسبب الزلزال.
وخلف وصول فريق الكوكب المراكشي قبل لحظات من اليوم الاحد، لمركز تحاقن الدم بمراكش، واحد الحماس كبير وسط الجماهير المراكشية والمواطنين اللي بداو كيشجعو وكيصفقو عليهم وبالمقابل بدا المدرب رضوان الحيمر واللاعبين ديال الفريق كيردو التحية لهم، فأجواء كلها تضامن وتأزر.
ودائما مع تضامن الفرق الوطنية، مشاو حسنية أكادير أكبر فريق فمنطقة سوس ثاني اكثر منطقة تضرارا بالزلزال، (مشاو) باللاعبين والطاقم التقني والمكتب المديري حتى هما اليوم الاحد لمركز تحاقن الدم فمدينة أكادير باش يتبرعو بالدم لضحايا زلزال الحوز المدمر، وراه الفرق الوطنية أغلبها غيمشي يعطي الدم.