كود – وكالات//

البنوك العالمية كتوجد راسها باش تحيد الكود PIN التقليدي ديال 4 أرقام، اللي كيستعملوه الكليان ديال البنوك لسنين.

هاد التحول خدامين عليه جوج شركات كبار ديال الخلاص، Mastercard وVisa، مني علنات Mastercard باللي غادي تحيد تدريجياً كلمات السر حتى لـ2030، وتعوضها ببصمة الصبعان، والتعرف على الوجوه، وتقنية التوكنيزيشن.

البطاقات البيومترية الجديدة غادي تكون خدامة بمستشعر كيقارن بصمات صبعان المستخدم مع البصمة المخزنة فالكارطة، ديك ساعة كيقبل السيستام العملية ولا كيرفضها مباشرة، بلا حتى كود أو توقيع.

هاد التوجه كيبين باللي كاين طلب شعبي كبير، حيث 81 فالمية من الناس اللي تسولو فـ14 دولة قالو مستعدين يستعملو البصمة عوض الكود السري.

الهدف النهائي ما واقفش غير فالبصمة، ولكن حتى الخلاص غير بالوجه ولا بالبصمة مباشرة بلا حتى كارطة، ولكن مزال كاينة تحديات ديال حماية المعطيات البيومترية وتوحيد المعايير التقنية على النيفو العالمي، هادشي كايبين باللي زمان الكود PIN غادي وكيسالي بشوية بشوية.