گود سبور//
توج منتخب الكوت ديفوار بلقب كأس إفريقيا للمرة الثالثة فالتاريخ ديالو، بعدما ربح اليوم الاحد فالفينال ديال النسخة 34 من المسابقة اللي نظمها فبلادو، منتخب نيجيريا فماتش مثير.
وسالا فينال كوب دافريك ’’الكوت ديفوار 2023‘‘، بين الإيفواريين والنيجيريين بنتيجة 2 لواحد لمصلحة الكوت ديفوار، مع العلم أن نيجيريا هما الأولين اللي ماركاو بهدف ديال وليام إيگونگ فالدقيقة 38، ولكن الإيفواريين بقاو كيقلبو على هدف التعادل وقدروا يماركيوه فالدقيقة 62 بواسطة فرانك كيسي، قبل ما يماركي سباستيان هيليي الهدف الثاني ديال الرباح واللقب للكوت ديفوار، فماتش مثير.
وبهذا الرباح كيتوج منتخب الكوت ديفوار بكوب دافريك 2023 اللي تنظمت فالأراضي الإيفوارية ما بين 13 يناير و11 فبراير 2024، وهي المرة الثالثة فالتاريخ الكوت ديفوار اللي كيربحو فيها كاس أفريقيا بعد 1992 و2015، وتعادلو مع نيجيريا اللي عندها 3 ألقاب واللي فشلت فالتتويج باللقب الرابع.
