كود الرباط//

الكسيدة لي وقعات صباح السبت 8 يونيو 2024، مع ديك 5 صباح تقريبا أول اقل، واللي مات فيها ولد مسؤول فالدولة. كترجع أسئلة كثيرة: كيفاش خرجو من ريسطو فيه باركينغ وهوما ناشطين. واش كانو بيلا ووو؟.

الخبار لي عند “كود” هي أن ولد المسؤول مع صحابو خرجو كيتسابقو وغاديين بسرعة كبيرة، مع العلم أن هاد ولد المسؤول كان راكب بنتلي (لي ثمنها تقريبا 200 مليون)، وكولشي كيعرف بنتلي يلا غادا بسرعة كبيرة شنو ممكن دير. ممكن طير بوطو (كيفما بان فالتصاور والفيديوهات للي عند “كود”).

معطيات جديدة توفرت لـ”كود” كتفيد أن الضحية للي توفى كان خارج من ريسطو مشهور مملوك لشخصية كبيرة فعالم المال والأعمال، مع ديك 4 صباح، مع العلم أن هاد الريسطو كيسد مع 3. يلا كان حال كثر من 3 صباح فراه فضيحة كبيرة.

هاد الريسطو لي عندو مساحة الفوق بلا زجاج كينشطو فيها الناس، معروف شكون لي كيمشي ليه، وحتى لهنا مكاين مشكل، ولكن راه هادي بلاصة مشهورة وفيها باركينغ. مثلا ففرنسا ميمكنش تخرج من باركينغ شي ريسطو يلا كنتي مفوت، مغاديش يخليك السيكيرتي ديال الباركينغ.

هادشي كيعاود يرجعنا لموضوع: الأنظمة القانونية فبلادنا؟ كيفاش غايتم تنظيم هاد الريسطورات باش نخففو من حوادث السير؟ وكيفاش خاص يتمنع أي واحد كان ناشط يصوك بفرض ذلك على الريسطورات يعني يصيطفوه ف ابليكاسيون أو طاكسي صغير.

طبعا أول حاجة خاصها تكون هي الرادارات، فاللي كيعرف البلاصة فين وقعات الكسيدة كيقولو بلي هنا مكاينش رادارات وداكشي علاش كولشي كيطير بسرعة هنا. وزيد عليها غياب المراقبة والبراجات لي كتكون مهمة فهاد البلاصة لي كيدوزو منها كبار المسؤولين.

فالأخير حجم الخسائر كتوضح بلي السرعة كانت قياسية. الجواب على الأسباب وكيفاش غايوضحها التحقيق لي تفتح.