كود-كازا//

غادي يكون الكسوف الكلي للشمس نهار 12 غشت مناسبة ماشي غير باش الناس يتفرجو فظاهرة نادرة، ولكن حتى باش المغرب وإسبانيا يخدمو مع بعضهم فواحد المشروع العلمي الكبير كيحاول يفهم أسرار العلبوب ديال الشمس، لي هو الطبقة الخارجية  اللي كتبان ملي كيغطي القمر قرص الشمس كامل.

مدينة بالنسيا الإسبانية غادي تكون مركز هاد المشروع، اللي سميتو NATE، وكيشارك فيه علماء من معهد جزر الكناري للفيزياء الفلكية وجامعة محمد السادس متعددة التخصصات التقنية فالمغرب. الغرض هو تركيب شبكة ديال تلسكوبات صغيرة فعدد من المناطق باش يصورو العلبوب ديال الشمس لمدة طويلة من الوقت اللي كدوم فيها الكسوف.

عالمة الفيزياء الفلكية الإسبانية إيفا فيلافر قالت بلي الكسوف هو الفرصة الوحيدة باش الإنسان يشوف هالة الشمس بعينيه، وضافت أنها كتنتظر هاد اللحظة من زمان وأكدات أن المشروع غادي يحول الصورة الثابتة للهالة ل “فيلم” كيبين كيفاش كتتغير مع الوقت.

أما الباحث المغربي يوسف مولان، وضح أن المشروع غادي يعطي للطلبة والباحثين المغاربة دور أساسي فالأبحاث، وما غيبقاوش غير كيتفرجو، واعتبرو أن التعاون العلمي بين البلدين خاصو يستمر حتى من بعد الكسوف.

الكسوف ديال 12 غشت غادي يكون غير تجربة أولى لاختبار الأجهزة، اما المرحلة الرئيسية غادي تكون فالمغرب نهار 2 غشت 2027، ملي غادي يدوم الكسوف أكثر من أربع دقائق، وغادي يوفر ظروف أفضل بكثير لدراسة هالة الشمس.

العلماء كيأملو أن تسجيلات هاد المشروع تساعدهم يفهمو كيفاش كتتشكل العواصف الشمسية اللي كتأثر على الأقمار الصناعية وشبكات الاتصالات، وحتى يحاولو يجاوبو على واحد السؤال اللي مازال محير العلماء: كيفاش العلبوب ديال الشمس حار بالملايين ديال الدرجات، عكس سطح الشمس أقل حرارة منو؟