كود سبور//

أكد منذر الكبير مدرب الرجاء الرياضي أن الفريق حقق الهدف ديالو ملي دخل يلعب ليكروب ديال عصبة أبطال إفريقيا وهو انه يسالي هذا الدور وهو متصدر، ولكن الفريق مازال خاصوا يتطور.

وقال منذر الكبير مدرب الرجاء بعد فوز الفريق على سيمبا التنزاني مساء يوم الجمعة 31 مارس: “الهدف ديالنا وصلنا إليه، ملي دخلنا في دور المجموعات كان لوبجيكتيف ديالنا نساليو حنا الاولين ومن الماتش الأول اللاعبين عطاو كل ما عندهم وعرفنا نجيريو ليماتش ديالنا ربحنا 3 أدوميسيل و 2 أليكستيريور”.

وكمل الكبير وقال: “في كل مباراة لعبنا كانوا شي حوايج خاصنا نتطورو فيهم كيفما الماتش اليوم ضد سيمبا، على مستوى صناعة الهجمات وفي الشوط أول كان الخصم واقف مزيان ولقينا صعوبة باش ندخلو على الأطراف وفي العمق وكان خاصنا نصبرو وهذا مكان وماركينا في وقت مزيان ولكن مع الأسف إرتكبنا أخطاء ورجع المنافس وتعادل ولكن كان رد فعل لكروب ديالنا وقدرنا نماركيو الهدف الثاني والثالث”.

وزاد الكبير وأكد بلي الفريق داخل في مرحلة مهمة ومازال خاص الخدمة: “دابا حنا في مرحلة نهاية الموسم وفيها ماتشات مهمة بزاف وخاصنا نتطورو فبزاف د الحاجات في إفتكاك الكرة والرجاء خصها تكون قوية دفاعيا وفي صناعة اللعب والفرص والتسجيل، نجحنا في حجات وكنا متوسطين في أشياء أخرى وبالعمل والتركيز غنزيدو نتحسنو وكنشكر اللاعبين اللي مضحين وكيخدموا على نفوسهم ومقاتلين رغم صعوبة الظروف”.