كود سبور//

تأهل المنتخب الوطني المغربي لثمن نهائي كاس إفريقيا “المغرب2025″، بعدما ربح منتخب زامبيا اليوم الاثنين فـ تيران مولاي عبد الله بالرباط، ضمن الجولة الثالثة من دور المجموعات ديال الكان.

وسالا ماتش المنتخب الوطني المغربي ومنتخب زامبيا بنتيجة 3-0 لمصلحة المغرب، وماركا أهداف المنتخب المغربي كل من أيوب الكعبي اللي سجل هدفين فـ الدقيقتين (9 و50)، وبراهيم دياز ماركا الهدف الثالث فـ (الدقيقة 27).

الماتش بين المنتخب المغربي وزامبيا عرف تغييرات كثيرة دارها الناخب وليد الركراكي فـ التشكيلة الأساسية، ودخل بمحمد الشيبي وعبد الصمد الزلزولي وآدم ماسينا، وكلس جواد الياميق وسفيان أمرابط وأنس صلاح الدين، وفـ الشوط الثاني عرف دخول اشرف حكيمي لاول مرة فـ هاد كاس افريقيا، بعدما دخلو الركراكي بلاصة نصير مزراوي فـ الدقيقة 64.

براهيم دياز وايوب الكعبي بهاد البيوتا اللي ماركاو على زامبيا متصدرين هدافين كاس افريقيا بثلاثة أهداف لكل واحد فيهم، مع الجزائري رياض محرز اللي عندو نفس الرصيد.

وبهذه النتيجة تأهل المنتخب الوطني المغربي إلى ثمن نهائي كاس افريقيا متصدر الكروب الاول برصيد 7 نقاط، ومالي الثانيين برصيد 3 نقاط، وجزر القمر وزامبيا بقات عندهم 2 نقاط، وغادي يلعب يوم الاحد المقبل فـ تيران مولاي عبد الله، اما ضد تنزانيا او بنين او السودان.