كود – سبور //

خرجات توجيهات جديدة من اتحاد البث الأوروبي مؤخرا بتعاون مع الاتحاد الأوروبي لألعاب القوى باش يتبدل أسلوب النقل التلفزيوني ديال مسابقات ألعاب القوى النسوية، ويولي التركيز على الأداء الرياضي ديال البطلات عوض التركيز على أجسادهم.

هاد التوجيهات جاو فوثيقة فيها 23 صفحة بعنوان “Raising the Bar”، وكيهمو تغطية مسابقات بحال سباقات السرعة، القفز العالي، القفز بالزانة والقفز الطويل.

الوثيقة كتنصح المخرجين يستعملو لقطات واسعة كيبانو فيها الرياضية كاملة وهي كتنافس، باش المشاهد تبين التقنية والحركة، بلا ما تكون الكاميرا كتركز على أجزاء معينة من الجسم ،كما كدعو لتفادي وضع الكاميرات فزوايا هابطة لتحت، وتجنب الزوم مني كيوجدو البطلات باش ينقزو.

وزادت الوثيقة وصات باش متبقاش الإعادات بالتصوير البطيء إلا كانت غير كتركز على المظهر الخارجي، وتعوض بإعادات كتحلل الأداء الرياضي.

وكيقولو الاتحاد بلي الهدف من هاد التوجيهات هو توحيد طريقة نقل البطولات الأوروبية، باش تكون التغطية أكثر احترافية وتحترم الرياضيات، مع التركيز على الإنجاز الرياضي والمنافسة، عوض الاهتمام بالمظهر الخارجي ديال البطلات.