گود سبور//

غادي يدير الاتحاد الافريقي لكرة القدم اجتماع باش يقرر الموقف ديالو تجاه مشروع السويسري جياني انفانتينو رئيس الاتحاد الدولي لكرة القدم من تحويل كاس العالم إلى شركة مستثمرين، وهذا الشي قبل مونديال 2030 اللي منظمو المغرب مع اسبانيا والبرتغال.

وقرر الاتحاد الافريقي لكرة القدم برئاسة الجنوب إفريقي باتريس موتسيبي، عقد اجتماع السيمانا الجايا لدراسة وتقييم مشروع جياني انفانتينو رئيس الفيفا، بتحويل كاس العالم إلى شركة بأسهم وبيعها لمستثمرين، مقابل استفادة الاتحادات القارية وبينها الكاف من حوالي 4 المليار دولار، او يبقى الحال كيفما هو دابا وتبقى تستافد من مليار دولار، مع العلم ان الكاف عندو علاقة مزيانة بزاف مع رئيس الفيفا انفانتينو، وهذا الشي اللي غادي يخلي اتخاذ قرار دهم المشروع او معارضتو يكون صعيب، في ظل غضب جمهور الكورة العالمي من هذا البروج.

وديما مع هذا الموضوع فالاتحاد الأوروبي لكرة القدم، كان واضح فالموقف ديالو من اول ما تسربات خبار مشروع انفانتينو تحويل كاس العالم إلى شركة ومستثمرين، وعبر على انه رافض هذا الشي، ودعا الاتحادات الوطنية والأندية واللاعبين والجماهير وكل من له علاقة بالكرة إلى رفض هذا المشروع، واكد ان الكورة ديال كلشي ماشي ديال البيع والشرا، وعلى نفس الخط مشى اتحاد امريكا الشمالية والوسطى والكاريبي ونفس الشي بالنسبة للاتحاد الآسيوي.

جياني انفانتينو ملي ناض عليه الصداع، بسبب هذا الخطة الجديدة ديال تحويل كاس العالم إلى شركة وبيع أسهمها للمستثمرين، خرج يبرد السوق ويمتص الغضب، وقال فتصريح له ان هذا غير مقترح مشروع عند الفيفا، وماشي قرار نهائي.