كود سبور//

ارتكب الاتحاد الإفريقي لكرة القدم خلال مراسم الإعلان عن البلد الفائز بتنظيم كأس إفريقيا نسخة 2025 ، ونسخة 2027 غلط كارثي فحق المغرب، وهذا الشي البارح فالمؤتمر الصحافي درالكاف بالعاصمة المصرية القاهرة ومازال ما خرج الاتحاد الأفريقي بحتى شي اعتذار عليه.

الاتحاد الإفريقي لكرة القدم برئاسة الجنوب افريقي باتريس موتسيبي، دار غلط كبير فالبروتوكول خلال الإعلان على البلد المستضيف لكأس إفريقيا 2025، اللي هو المغرب واللي طبعا ربح التنظيم عن جدارة واستحقاق وبقوة الملف المغربي اللي كان داخل لاكورس صحيح بتيرانات وبنية تحتية متطورة، وحسب المتتبعين راه مستحيل شي بلد يقدر ينافس المملكة المغربية حاليا فإفريقيا لا فتنظيم التظاهرات الرياضية او غيرها حيث الإمكانيات اللي كيتوفر عليه المغرب حاليا متطورة وهاربان بزاف على باقي الدول الأفريقية بمن فيهم جيرانو اللي حداه.

الغريب فالأمر أن رئيس الاتحاد الأفريقي باتريس موتسيبي ما رفعش لافتة فيها علم واسم المغرب باش يعلن على الفوز ديال المملكة المغربية بتنظيم كاس إفريقيا 2025، وبالمقابل هز لافتة فيها أسماء وأعلام كينيا وأوغندا وتنزانيا وهو كيعلن على فوزهم بتنظيم كاس إفريقيا 2027، لدرجة أن كلشي اللي متبع المؤتمر الصحافي اعتقد أن البروتوكول سبق الإعلان على مستضيف 2027 قبل من 2025، لكن رئيس الكاف دوا من بعد عادي وبدا كيجاوب على اسئلة الصحافيين، وبعدها هو وأعضاء المكتب التنفيذي د الكاف تصورو مع فوزي لقجع رئيس الجامعة الملكية المغربية لكرة القدم الفائزة بتنظيم 2025، ثم تصورو مع رؤساء اتحادات كينيا وأوغندا وتنزانيا اللي ربحو تنظيم 2027، وسالات الحفلة.

الغلط اللي دار الاتحاد الإفريقي لكرة القدم والرئيس ديالو باتريس موتسيبي فالبروتوكول ديال الإعلان على مستضيف كأس أفريقيا 2025، مازال ما خرج الكاف يعتذر عليه ويوضح أنه والمسؤولين فيه غلطو وبلي هذا الشي ما عندو علاقة بأحقية وجدارة المغرب فالفوز بتنظيم كأس أفريقيا 2025، حيث الملف المغربي كان داخل صحيح، لدرجة أن كل المنافسين ديالو إنسحبو قبل التصويت، ومنهم الجزائر اللي هربت قبل من اجتماع الكاف بيومين، وطبعا وتفاديا لتأويلات شي وحدين اللي كيقلبو على أي حاجة يغطيو بها على إخفاقهم وفشلهم فتنظيم كوب دافريك، خاص الكاف يخرج فبيان يوضح أن البروتوكول ديال الإعلان عن مستضيف كاس أفريقيا 2025، وقع فيه غلط وان المغرب ما عندو علاقة به وأكثر من هذا خاصو يعتذر من المغرب والمغاربة ومن الجامعة الملكية المغربية لكرة القدم، وهذا الشي اذا كان كيحترم راسو حيث كون وقع غلط بحال هذا فالاتحاد الدولي لكرة القدم او الاتحاد الأوربي كانو غيخرجو باعتذار.