كود – عثمان الشرقي //

محمد رمضان غادي يغني رسميًا للمرة الثانية فـ كأس أمم إفريقيا اللي غادي تتقام فالمغرب السيمانات الجاية، هاد الخبر خرج فحلقة خاصة فبرنامج «أجمد 7» وفين عبر رمضان على فرحتو واعتزازو بالمشاركة ديالو، وقال أن الهدف ديالو هو نشر الفن فإفريقيا وخارج مصر، والمحافظة على الغناء بالعربية، وغادي يغني على ريتم إفريقي، وحتى جاب ستيليست من نيجيريا باش يكون المظهر ديالو قريب من الذوق ديال الجمهور الإفريقي.

طبعا المصري ما قالش شكون اللي غادي يكون معاه من الفنانين والفنانات من المغرب وافريقيا. حسب مصادر “كود” فالفنان العالمي ريدوان مدة وهو كيوجد لحفلتو فهاد الافتتاح اللي غادي يبدا مع الستة دالعشية 21 دجنبر 2025 بالمركب الرياضي مولاي عبد الله بالرباط.

الملعب اللي غادي يزيد يتفركس بعد ما زادوه “ليليد” باش يكون اضاءتو اكثر جمال، غادي يعرف حفل افريقي كبير. الفنانة الكبيرة انجليكيك كيدجو غادية تشارك فهاد الحفل الافتتاحي بحالها بحال المغربية نورة فتحي ونجوم اخرين.