كود سبور//

سلط الاتحاد الأفريقي لكرة القدم، الضوء على الوداد الرياضي ممثل المغرب والكرة الأفريقية فكأس العالم للأندية 2025 فالميريكان، والمشاركة ديالو فهاد البطولة العالمية.

ووصف الاتحاد الأفريقي لكرة القدم لگروب 7 اللي طاحو فيه الوداد فمونديال الأندية بمجموعة الموت، وقال: “غايلعبو اللي طاحو فوضع ما يقدروش عليه بزاف “مجموعة الموت”، ضد مانشستر سيتي، بطل النگليزً وأوروبا، ويوفنتوس، عملاق الطاليان الإيطالي، والعين، المتصدر بلا منازع فالإمارات وهذا ثلاثي واعر”.

وهضرو الكاف على الموسم الكارثي للوداد تحت رئاسة هشام آيت منا واللي خرجو منو بزيرو لقب: “على الصعيد الوطني، افتقر موسم الوداد إلى التألق، وبعدما احتل المركز الثالث فالبطولة، ما قنعش الفريق بالمستوى ديالو المتتبعين”.

وكملو الكاف وقالو: “واخا الخبرة ديالو الأفريقية كاينين شكوك واش يقدرو الوداد ينافسو فالنيفو ديال كاس العالم للأندية، ولكن بحال هاد البطولات ما فيهاش المنطق”.

وتطرقو الكاف للاعبين اللي ممكن يكونو مفاتيح الوداد فالمونديال، وقال: “التألق الفردي مطلوب، ومحمد رايحي هداف النادي هذا الموسم بـ11 هدف غايكون التهديد الحقيقي كجناح أيسر، وكاسيوس مايلولا، واخا ماركا غير 5 أهداف هذا الموسم، راه قادر على حسم الفرص بانطلاقاتو وكفاءتو قدام المرمى، فوسط التيران غايواجه كل من أسامة زمراوي وإسماعيل مترجي مهمة صعبة فتنظيم إيقاع اللعب، وتخفيف الضغط، والتقدم بسرعة للقدام ملي يرجعو الكورة، والدفاع ديال الوداد مطالب يكون فالطوب ديالو، حيث قدام فرق بهذه القوة، يقدر يكون أي خطأ بسيط الثمن ديالو غالي، لكن تاريخ كرة القدم حافل بمواقف طيح فيها التنظيم والثقة فالنفس فرق كبيرة، والوداد حتى هما كايحلمو يكتبو شي فصل جديد من تاريخهم”.

وزادو الكاف: “قلال اللي كايتوقعو أن الوداد يفوتو الگروبات، لكن الفريق الأحمر عمرو ما تردد فمواجهة الصعاب، وأنه يحبط الخصوم ديالو ويستغل الفرص ولو تكون صغيرة، وحماس الجمهور يقدر يكون وصفة معجزة، وغاتكون كأس العالم للأندية اختبار حقيقي، لكن بروح عالية وانضباط وجرأة لا تُضاهى، وراه المدرب أمين بنهاشم قادرين يماركيو”.