كود سبور//

قرر الاتحاد الإفريقي لكرة القدم يزير الشغل مع الصحافيين اللي كيتعتامدو لتغطية منافسات الكاف، وهذا الشي بسبب عدد من الخروقات والمشاكل اللي وقعت بين الصحافيين فكوب دافريك 2023، اللي منظمة حاليا فالكوت ديفوار.

وعلن الاتحاد الإفريقي لكرة القدم فبلاغ صارم له، أنه لاحظ تصاعد سلوك غير لائق وغير مهني من بعض ممثلي وسائل الإعلام فالبلايص المخصصة للخدمة ديال الإعلاميين فمسابقة كأس الأمم الأفريقية 2023.

ووضح الكاف أنه دار اجتماع بسبب هذا الشي مع اللجنة المنظمة المحلية والبوليس لمناقشة الوضع وإيجاد حلول عملية، وأنه اتصل بعدد من المنظمات اللي كتمثل الصحافيين وأثار مخاوف جدية بشأن سلوك بعض “الصحافيين” فمنصة الصحافيين والمراكز الإعلامية والمناطق المختلطة.

وأكد الاتحاد الإفريقي لكرة القدم فالمستقبل، غيتعزل أي صحافي كيشارك فاحتفالات وكيسيئ إلى الزملاء ديالو الإعلاميين وفالبلاصة وبتدخل الأمن وغيتحيد له الاعتماد، وأنه غيتلغى اعتماد أي ممثل إعلامي كيشارك فالمضاربات والشجار فالمناطق الإعلامية، وغيجريو على أي صحافي (ما عندوش حقوق) وكيصور وغيحيدو له الاعتماد.

للإشارة فالماتش بين المنتخب المغربي ومنتخب الكونگو الديمقراطية ضمن دور مجموعات كوب دافريك كانت فيه مضاربة بين الصحافيين.