كود سبور//

أكد الاتحاد الإفريقي لكرة القدم مرة اخرى، أن التوني ديال نهضة بركان اللي فيه خريطة المغرب، شي حاجة عادية وما فيه حتى مشكل، وهذا الشي بعد قضية دومي فينال كاس الكونفدرالية بين الفريق البركاني واتحاد العاصمة الجزائري، قبل شهرين ونص من دابا.

وخلال حوار دارو مع bbc قال الأمين العام للاتحاد الأفريقي موسينگو أومبا: “لجنة المسابقات فالاتحاد الأفريقي كاتشوف أنه ما كاين حتى شي مشكل فالخريطة حسب لوائح الكاف، وقرار الطاس غايخلينا نحسنو اللوائح ديالنا”.

وكانو كابرانات الجزائر تعداو على نهضة بركان ملي وصلو لمطار هواري بومدين بالعاصمة الجزائرية باش يلعبو ضد اتحاد العاصمة فدومي فينال كأس الكاف، واحتجزوهم وحجزو على تونيات الفريق حيث فيهم خريطة المغرب، واخا الاتحاد الإفريقي مرخص للفريق البركاني يلعب بهاد التونيات قبل ما تبدا المسابقة، وهذا الشي تسبب فأن الماتش ما تلعبش واعتبر الكاف الفريق الجزائري خاسر الذهاب بنتيجة 3 لواحد أمام الفريق المغربي، ونفس القرار كان فالروتور فبركان ملي اتحاد العاصمة ما بغاوش يلعبو خوفا من الكابرانات، وتقصاو بمجموع نتيجة الذهاب والإياب وطلعو نهضة بركان للفينال.