كود سبور//

طايحين السلطات الجزائرية فحرج كبير أمام الرأي العام الجزائري، حيث كاين احتمال كبير يتكرر مرة اخرى سيناريو دومي فينال النسخة الماضية من كاس الكونفدرالية الأفريقية بين نهضة بركان واتحاد العاصمة الجزائري، (يتكرر) مرة اخرى ويطيح فريق جزائري مع النهضة البركانية فنفس الدور من هذه النسخة سوا اتحاد العاصمة او شباب قسنطينة، والكابرانات والرجال ديالهم مازال عاطيينها لسياسة السريح بدل انهم يديرو عقلهم ويبعدو الكورة السياسة واستغلالها لتعميق المشاكل الدبلوماسية اللي خالقينها مع دول الجوار، وأبزها نزاع الصحرا اللي مفتاعلينو مع المغرب.

الإعلام الجزائري وبسبب الضغط اللي تعرض له والانتقاد الكبير اللي توجه له من الرأي العام الرياضي الجزائري بعد اقصاء اتحاد العاصمة من دومي فينال النسخة الماضي لكاس الكونفدرالية، بلا كورة امام نهضة بركان بسبب جهل الكابرانات واستغلالهم الكورة سياسية بلا موجب شرع على حساب الفريق الجزائري العريق اتحاد العاصمة، حاول يستغل انتخاب وليد صادي رئيس الاتحاد الجزائري لكرة القدم، اليوم الخميس لولاية جديدة، وسولوه الصحافيين الجزائريين على قضية دومي فينال النسخة الماضية بين نهضة بركان واتحاد العاصمة فين وصلت، وجاوب وحاول يسرحهم تاني وقال: “نتمناو قرار الطاس يخرج قبل نهاية شهر مارس ونخليو لكل مقام مقال”.

وخايفين جمهور اتحاد العاصمة وشباب قسنطينة الجزائريين من تكرار سيناريو النسخة الماضية من كاس الكونفدرالية الأفريقية إذا طاحو مع نهضة بركان فهاد النسخة، وهذا الشي بعدما ربح الفريق المغربي القضية ديالو فالكاف وتأهل بالقانون، بعدما تعرض لاعتداء من السلطات الجزائرية فمطار هواري بومدين بالجزائر قبل ماتش الذهاب، ملي تم حجز التونيات ديال الفريق المغربي واحتجاز اللاعبين ديالو لساعات بالمطار، حيث التونيات فيهم خريطة المغرب، وما تلعبش الماتش وتحسب اتحاد العاصمة خاسر بـ3 لزيرو، وفماتش الروتور ما بغاش الفريق الجزائري يلعب فبركان حيث خافو من الكابرانات اللي هددوهم بعقوبات ملي يرجعو لبلادهم، وهذا الشي كامل حيث الكابرانات عندهم عقدة من خريطة المغرب، واعتبر الكاف اتحاد العاصمة خاسر حتى فهاد الماتش حتى هو بـ3 لزيرو، وتأهلو نهضة بركان للفينال بموجب وقوة القانون.

ويعتبر نهضة بركان ابرز المرشحين للتتويج بكأس الكونفيدرالية خلال هذه النسخة، وغايلعبو فربع النهائي مع أسيك ميموزا الايفواري، وفحالة تأهلو إلى دومي فينال المسابقة الافريقية، غايلعبو ضد المتأهل من اتحاد العاصمة او شباب قسنطينة الجزائريين، وهذا الشي اللي كايعني ان سيناريو دومي فينال الموسم الماضي ممكن يتعاود، حيث الفريق المغربي ضابط الامور القانونية قدام الكاف ومحترمها، والتوني ديالو مرخص من الاتحاد الافريقي، والكابرانات هما اللي خاصهم يديرو عقلهم ويخليو الكورة تلعب والفريق المزيان واللي يستاهل هو اللي يربح ويتأهل، ولو ان نهضة بركان قوي بزاف على الفريقين الجزائريين بالكورة دابا.