كود أسماء غربي مراكش///
حرب نفسية بدات فقيادة الأصالة والمعاصرة باش يوجدو لطرد راس من الريوس 3. يتعلق الأمر بصلاح أبو الغالي. حسب مصادر بامية لـ”كود” فهناك اتجاه يطبقو فيه مدة حسن السيرة. اش دار بالسلامة ؟ مصدر “كود” قال باللي كانت عند عائلتو أرض وباعها لرجل البام القوي مول لفروماج عبد الرحيم بن الضو ومن بعد جا إبراهيم مجاهد رئيس جهة بني ملال سابقا واللي حتى هو فالبام وعطاه كثر وباعها ليه.
مصدر آخر لـ”كود” أكد باللي عملية البيع والشرا ما عمرها تمت. اللي كاين هو وعد بالبيع وكان عند النوطير الشنگيطي اللي حتى هو برلماني مع التراكتور، وباللي بعد ما تعطلات العملية 3 سنين، جا واحد أخر وعطى فلوس كثر.
مصدر “كود” أكد باللي الأرض ديال عائلة أبو الغالي وباللي العملية شرف عليها أخ صلاح الدين اللي كيسير إذاعة “لوكس راديو”.
المصدر استغرب إقحام عملية بيع وشرا فتدبير حزب، لكن قيادي فالبام أكد لـ”كود” باللي كاينة حروب اليوم بين أبو الغالي من جهة وبن الضو وكوكوس نجوى رئيسة المجلس الوطني للبام اللي دايرة تحالف مع مول الفروماج وواعدها يدعمها تترشح فأنفا باسم البام ويمول حملتها. مصدر “كود” قال إن الشنگيطي اللي كيحلم شي نهار يولي كاتب دولة، كيدعم كوكوس وبن الضو.
لكن مصدر آخر من قيادة البام، استبعد طرد أبو الغالي لسبب تافه بحال هاكا. “الحزب تالف ولكن ماشي لدرجة يطردو قيادي من القيادة الثلاثية بسباب لفلوس. المنصوري (بنت الباشا) ما عندهاش مع أبو الغالي ولكن ما تقدرش تغامر بطردو اليوم. يمكن هادا تكتيك منها باش ما يدخلش للحكومة إيلى وقع تعديل فالدخول السياسي المقبل”.
