كود الرباط//

خرج حكم مؤخرا عن المحكمة الابتدائية فالقنيطرة كيعتبر بلي تبادل القبل ماشي دليل على الخيانة الزوجية.

هاد القرار جاء فحكم صادر نهار 12 فبراير 2024، بعدما رفعت مرا براجلها دعوى قضائية بتهمة الخيانة الزوجية، وعطات دليل فيديو كيوضح بلي راجلها نعس مع صاحبتو فدارو ولكن “غير كيتباوسو”.

المحكمة وضحات فالحكم ديالها أن الخيانة الزوجية فالقانون المغربي خاصها تكون مصحوبة بعلاقة جنسية وماشي تبادل القبل، حتى إلا كان تصرف ماشي مقبول عند بزاف الناس، ما كيرقاش لدرجة الخيانة اللي كيجرمها القانون.

المحكمة لاحظات أن الفيديو ما فيهش دليل واضح على علاقة جنسية، واعتبرات أن البوسان بوحدو ما كافي باش يتحسب خيانة.

الزوج اعترف بلي غادي يخطب المرا لي كانت معه فالفراش، وهو كان غادي يطلق، حسب المحاضر ديال الاعترافات.

القاضي خرج بحكم البراءة للمتهمين، وقرر أن تبادل القبل ما كيتعتابرش خيانة زوجية، حيث القانون كيربطها بالممارسة الجنسية. هاد الحكم خلق نقاش واسع فالمجتمع، وعاد فتح الجدل على شنو بالضبط اللي كيتحسب خيانة زوجية قدام القانون.