سهام البارودي- كود//

خاص تكون طفل امازيغي عندك ست سنوات و من الاطلس المتوسط و لا جبال سوس و لا الريف موالف كاتهضر معاك مك بالشلحة و تمشي أول نهار للمدرسة العمومية و تلقى المعلمة كاتهضر بالعربية باش تفهم باش كايحسو بزاف ديال الاطفال الامازيغ فهاد البلاد او باش كانو كايحسو طيلة سنوات، انا شخصيا عندي صديقة من الريف عاودات ليا بلي الايام الاولى ديالها فالمدرسة الابتدائية كانت كادوزها غا بكا من الثمنية تال الخمسة د العشية تاكايتنفخو ليها العينين و كاترجع للدار لاهي قادرة تفهم المعلمة و لا المعلمة قادرة تفهمها.

و خاصك تكون امازيغي باش تفهم باش كايحسو بزاف ديال الامازيغ فاش كايسمعو جملة ” الشلح غا شلح” و ” نتوما الشلوح …” و “قالك هذا واحد السوسي” و “بنات الخميسات داو الفليسات” و “الخميسات لا صحة لا فليسات” و “حقي فالشلوح و لا نطيح الروح” و “عاوتاني كاتهضرو بديك نغ نغ نغ ديالكم …”  الشلح، السوسي، الگربوز، الگربوزة…. بزاف ديال العنصرية تعرضو ليها و مازال كايتعرضو ليها الامازيغ فهاد البلاد لي بلادهم اصلا فالادارات و المدارس و الجامعات و السبيطارات ….

مايمكنش نمسحو السما بليگة، و نگولو بلي گاع المغاربة فحال فحال حيت كاين واحد النوع ديال الضسارة واحد النوع ديال العدوانية و النظرة الدونية للامازيغ مازالة فالمخيلة الشعبية و هي لي خلات الياس المالكي فلحظة سهو يقول ديك ” الشلح غا شلح ” راه كاينة واحد العنصرية مقيتة مغلغلة فالمخيلة الشعبية عند بزاف ديال الناس و زادت اججاتها التلفزة و الراديو و السيتكومات و الاغاني و حتى السوشل ميديا.
غاتقوليا وا المغاربة كايمارسو العنصرية مع بزاف ديال الناس العروبية و الكوحل و العيالات … ايه آسيموحمد و لكن واش دابا هذا سبب غايخلينا نسكتو صافي غا حيت العروبية كايتسبو و يسكتو تا الشلوح يتسبو و يسكتو ؟
راه 2024 هادي، ماكاين لاش طفل امازيغي يسمع جملة ” الشلح غا شلح” فالسوشل ميديا و حنا كانعيشو فعصر اللانش بوكس !
النقاش ديال واش جملة الشلح غا شلح داخلة فحرية التعبير و لا لا ! هادا القضاء هوا بوحدو لي قادر يفصل فيه و يقولينا واش عادي تتقال جملة الشلح غا شلح من طرف مؤثر كبير فالسوشل ميديا و لا لا ؟ واش عندها تأثير و كاتعتابر تهديد و ضرر لللآخرين و لا لا ؟ ماشي انا و لا طوطو و لا نتا و لا الرمضاني. القضاء، ياك المغرب فيه قضاء نزيه ؟ وا خليوه يقول كلمتو الله يرضي عليكم.

الدولة خاصها تحرص انها تصحح المسار الخاطئ لي مشات فيه مدة طويلة، من الانتقاص من الامازيغية و اعتبارها ماشي هي الاصل بل غي خضرة فوق الطعام، سنوات ديال الاقصاء ديال العنصر الامازيغي خلات حتى نسبة كبيرة ديال الامازيغ مايرضاوش براسهم و بالهوية ديالهم. راه حتى لهنا لهنا عاد بدينا كانتصالحو مع التاريخ ديالنا الحقيقي و الهوية ديالنا الحقيقة بعيدا على داك التزوير و الكذوب لي كبرنا فيه.

فداكشي علاش اليوم خاص القضاء يقول كلمتو و نشوفو جملة الشلح غا شلح شحال كاتسوى فميزان العدالة.