كود – سبتة//

كشفات معطيات جديدة من سبتة أن القضاء الإسباني كيتابع 6 حالات للاشتباه فاعتداءات جنسية، كيعتقد أنها وقعات فالسياق ديال الدخول الكبير لآلاف دناس على لمدينة فأخر نهاية شهر يوليوز ليفات.

وحسب المعطيات اللي نقلتها مصادر صحية وقضائية نشراتها جريدة الفارو ديال سبتة،  فغالبية الناس اللي تقدمو بشكايات أو طلبو المساعدة الطبية بسباب هاد الاعتداءات هما عيالات، مع احتمال يكونو رجال وقاصرين من الحالات المبلغ عليها.

وفالوقت اللي فتحات فيه السلطات القضائية تحقيقات فهاد الملفات، كاين مؤشرات على أن العدد الحقيقي للحالات يقدر يكون كبر من عدد الشكايات اللي وصلات رسمياً للقضاء.

لي خدامين فسبيطار جامعة سبتة فادو بأن عددا من الناس توجهوا للسبيطار للإبلاغ على اعتداءات جنسية، من بينها حالات اغتصاب.

وفنهار الثلاثاء 4 غشت بوحدو، استقبل السبيطار 3 حالات محتملة مرتبطة باعتداءات جنسية، وفق المعطيات المتوفرة.

هاد الوضع خلا قلق عدد من سكان الأحياء اللي كيتجمعو فيها الحراكة، خصوصاً المناطق القريبة من حي الأمير، وقال رئيس جمعية سكان حي الأمير ألفونسو إنه توصل بشهادات مباشرة كتهضر على اعتداءات جنسية مزعومة على أطفال فمحيط الحي، وهي معطيات مازالت خاضعة للتحقيق.

وخا فتحات التحقيقات القضائية، أكدت السلطات الإسبانية أنه حتى دابا ما تم تسجيل حتى اعتقال مرتبط بهاد الشكايات. وفلمقابل، كتواصل الشرطة الوطنية عمليات المراقبة والفرز وسط المهاجرين اللي مازالين كيتجولو أو كيتجمعو فسبتة، من بعد موجة الدخول الجماعي اللي عرفتها المدينة نهاية يوليوز.