الرئيسية > آراء > القصة الكاملة: كيفاش دخلات جهات لاستهداف ولد الرشيد قبل قيامة 2021 وكيفاش دخلات القبلية فحربها عليه
12/07/2019 10:00 آراء

القصة الكاملة: كيفاش دخلات جهات لاستهداف ولد الرشيد قبل قيامة 2021 وكيفاش دخلات القبلية فحربها عليه

القصة الكاملة: كيفاش دخلات جهات لاستهداف ولد الرشيد قبل قيامة 2021 وكيفاش دخلات القبلية فحربها عليه

الوالي الزاز -كود- العيون ////
[email protected]

تشهد مواقع التواصل الإجتماعي بالصحراء سجالا غير مسبوق على خلفية التصريحات التي أدلى بها رئيس الجماعة الحضرية للعيون، حمدي ولد الرشيد، حول ملف الهجرة السرية بعد غرق ثمانية أشخاص ستة منهم من أبناء العيون نواحي مدينة الداخلة.

القصة بدات بسؤال وجهاتو “كود” فندوة صحافية تم تنظيمها بعد جولة قادها حمدي الرشيد للأوراش التنموية بالعيون، ولي كان فيه إستفهام حول موقف ورأي رئيس الجماعة من هاد الواقعة، وفهاد الحالة كان جواب حمدي ولد الرشيد واضح وهو أنه ضد الهجرة السرية وتعريض الشباب حياتهم للخطر ومادام غادي يهاجرو أحسن ليهوم يخدمو فبلادهم، مع التأكيد بصريح العبارة أن إسبانيا ما فيها مايدار، وكذا الإستدراك أن الى بغيتي تهاجر بشكل قانوني وعندك مؤهلات وكفاءات وشهادات أكاديمية فهداك كيبقا اختيار الشباب وهو ماشي ضدهم.

إلى حد الآن قصة التصريحات ما بداتش لأن ولد الرشيد زاد وعقب وإستعمل ألفاظ إعتبروها شي وحدين ماشي هي هاديك وقالك علاش يهين المهاجرين بقوله أنهم كيغسلو لماعن -هادي حقيقة- وزاد بأن كاينين وحدين -كيغسلو مؤخرات الأجانب- وهادي حتى هي حقيقة وبنادم كيتخلص عليها، واردف أن هاد الخدمة اذا كنتي غادي تخدمها فبلاد برة أحسن ليك تخدم فبلادك معزز مكرم وأن كاينة شركات كتخدم فالعيون وعطا مثال بأن كاينة خدامي فالصيد البحري ب200 درهم للنهار وحتى البناء الناس كتخدم ب 100 درهم فالنهار وماشي عيب، وذلك في إحالة على أن الخدمة خاص تكون بكرامة فبلادك حسن ليك، متسائلا علاش هاد الناس كيخدمو على برة فهاد المهن وما كيبغوش يخدمو فبلادهم.

هاد التصريحات لي قال حمدي ولد الرشيد حقيقية ووقائعها باينة لاي حد. وحنا كلنا عندنا أصدقاء وغيرو خدمو هاد لخدامي، ولكن عقب التصريحات بانت جهات معينة على الواجهة وإقتطعت تصريحات حمدي ولد الرشيد وخدات منها لي بغات باش تعزز أطروحتها وتصور رئيس بلدية العيون على أنه مخطأ وتهجم على المهاجرين وهادشي ما كانش لأن السيد قال الحقيقة وغالبا الحقيقة ما كيبغيها تا حد وما كيقبلهاش بحكم أنها غالبا كتكون مؤلمة.

من بعد تقطيع الفيديو الناس خدات فكرة ناقصة وبالتالي صح فيها القول انها خدات “ويل للمصلين” بحيث لعبات شي جهات عليها مزيان لأهداف معينة كلها شنو عندو كاين لي عندو حقد دفين على ولد الرشيد وكاينة فئة ما كاتحملش قبيلة الركيبات لي منها ولد الرشيد وكاين لي ركب على الموجة باغي يستافد ويلوي ذراعو وكاين أيضا لي عندو أهداف انتخابية من الدرجة الأولى وكاين لي ما حاملش ولد الرشيد لله في لله.

باش نزيدو نفصلو يمكن لأي واحد يختالف مع ولد الرشيد فتوجهو وهاد الإختلاف يكون مبني على حقيقة وواقع، ولكن باش تخلي جولة صحافية على كَدها من العاشرة صباحا إلى غاية 16 عصرا كان فيها زيارات ميدانية لأزيد من 10 مشاريع سوسيو اقتصادية عندها تماس مباشر مع الساكنة وتمشي تقطع فيديو فيه كلام حقيقي وتسوقو كيف ما بغيت. فهادشي يعتبر تجني وظلم حقيقي للسيد لي فعمرو سبعين سنة ستة ديال الساعات كيهدر ويطلع ويهبط وخدام على مدينتو بشكل باين وهنا غادي نستشهد بواقعة نقلها لي صديق في لقاء بين والي جهة العيون الساقية الحمراء عبد السلام وبكرات وبعض الاعيان والشيوخ من بعد زيارة دارها وفد أجنبي للعيون وقال ليهم بالحرف “حمدي خدام مزيان واليوم لقيت ما نوري للوفد الأجنبي”. وهادي شهادة جا قالها والي براني جا وشاف بعينيه. يعني كيفاش انت ما شفتيهاش يا ولد لبلاد. فهاد الحالة المشكل فعينيك وعقليتك لي خاصها المراجعة والتجرد من الخلفيات.

معطى آخر هاد الناس لي كيروجو بأن ولد الرشيد أخطأ وتعدا على المهاجرين وكيقولو بأنهم مع هموم الساكنة ومصطفين معاهوم فين مشاو عن الوقفات الاحتجاجية ديال المعطلين علاش ما يقولوش رأيهم فيها ويعبرو وينقلو ملفهم المطلبي؟ وزايدون ياك العيون فيها بطالة علاش ما يهدروش على الفوسفاط وشركة فوس بوكراع لي ولات بحال غوانتامو محاصرة وعلاش ما يهدروش على الصيد البحري خصوصا ان هادي هي الثروات لي عندنا فهاد الصحرا، واش هاد السيد ما عمرو دارها مزيانة كاع على الأقل باش تكسب مصداقية خاصك تتعاطى لكلشي وكيفاش انت أصلا كادير غا السلبي واش هاد السيد ما عمرو دارها مزيانة كاع ؟

ولد الرشيد كيقول غيرما مرة أن الشغل ماشي من اختصاصو وعلى الرغم من ذلك أكبر مصلحة خدامين فيها ولاد لبلاد راه هي البلدية لي كتعطى فيها لولاد التراب الاولوية. وثانيا السيد داير جيست وكيجوه الناس ويقولهم اذا بغيتو تخدمو فشركات خاصة مرحبا. وهادشي وقفنا عليه حتى فالجولة الميدانية لي دارت فاش جا شاب عندو هاز سي في ديالو وقالو نفس الهدرة وحدد معاه موعد.

الى حد الآن هاد المسؤولين على هاد الحملة فعلا كان عندهوم دور توجيهي سلبي يخدم أجندة معينة، ولكن لي ما مقبولش ولي زاد صب الزيت على النار توصل بعض صحاب الصفحات الفيسبوكية بتهديدات على خلفية تعاطيهوم مع الواقعة. فحالة تعاطيهوم كان سلبي وما يمكنش يكون بريء ولكن فحالة اخرى تهديدهم والبحث عن إخراسهم من طرف شي وحدين ادعاو أنهم مناصرين لولد الرشيد راه جريمة فدولة فيها قانون وأمن وقضاء.

الأكثر من ذلك دخلات على خط فئة ما مفهومش توجهها ولي عندها حقد على ماشي على الرشيد كشخص او رئيس جماعة بل لإنتمائه القبلي، وهاد الناس فيه صحاب صفحات فيسبوكية خاضو حرب قبلية نتنة بالوكالة وروجو ورقة عامرة سب وشتم فحق ولد الرشيد بسباب انتمائو القبلي -كود عندها نسخة منها- كانت عامرة بالسب والشتم والاوصاف العنصرية المقيتة وتوصيفات اقل ما يقال عنها انها فيها إهانة وإحتقار كبيرة للركيبات ولأهل الرشيد.

هاد الورقة خلات الحرب تفتح باب القبلية وبالتالي ولد الرشيد كشخص راه ولد ناس وولد قبيلة كبيرة كيتضرب ليها ألف حساب من قرون هادي سواء من لدن الفرنسيين او الإسبان وغيرو. وما يمكنش يمر التطاول عليها مرور الكرام خصوصا إذا كان حجمك بالمقارنة معاها صغير أو ما عندكش تاريخها. هادشي كيف قلنا استدعى أن شيوخ القبيلة يدخلو على الخط ويرسلو رسالة مفادها أنه ما كاين حد يقدر يتطاول على الركيبات ورسلو رسالة كتقول وقرونا نوقروكم وكيقول مثل حساني -لبل تبرك على كبارها- بمعنى أن الإبل كتعول على لكبيرة فيها.

المجتمع فالصحرا فيه نزعة قبلية وهادشي لا يختلف عليه إثنان ولكن هاد القبلية فيها ماهو إيجابي وفيها ماهو سلبي. ولكن الغريب والغريب فالأمر هو أن ولد الرشيد كانت عندو قراءة وتحليل منطقي للأمور فالندوة وكأنه عارف شنو غادي يوقع، بحيث إستحضر مسألة القبيلة فالصحرا وقال أنه ماشي قبلي وأن حزبو فيه كاع القبائل واستشهد برئيس المجلس الاقليمي لي كان حداه مولود علوات لي من قبيلة ازركيين. والأكثر من ذلك فجوابو على سؤال ديال “كود” حول نزاع الصحرا واستقالة هورست كولر قال بلي الصحرا ما يمكنش تكون فيها دولة لأنها عُرضة للفتنة وللمشاكل فالقبايل. وهادشي شفناه فعلا بعد الندوة الصحافية بدقائق.

موضوعات أخرى