كود هناء ابو علي كازا ///
ما فهمناش اش كان كيدير ورئيس مجلس الإدارة الجماعية للقرض الفلاحي للمغرب محمد فيكرات هادي سيمانا وبالضبط 14 نونبر 2025 فاعطاء الانطلاقة الرسمية للموسم الفلاحي 2025/2026 بالعرايش.
هاديك ماشي بلاصتو. هاد الرئيس ما داير والو باش يحمي الفلاح الصغير. من نهار مشى نور الدين بوطيب اللي دوز وقت قصير، كيحمي هاد البنك ومهي غير فديناصورات الفلاحة. كيديرها غير فالفلاحة لكبار.
بوطيب كان ناض لهادوك الباندية فيهم. طالبهم يرجعو لفلوس ديال القرض الفلاحي. النتيجة جروا عليه هادوك الديناصورات. دابا جاهم خادم مطيع اسمو فيكرات اللي كان ف”كوزيمار”. خدمتو يتهلى فلكبار. فهاد البنك اللي كيحكم ماشي رئيس مجلس الادارة. اللا شي مدراء محميين دايرين ما بغاو. باش ولى هاد البنك كيعطي قروض للطاشرونات، نسى مهمتو اللولى اللي هي دعم الفلاح الصغير اولا ثم الكبير.
وباش فيكرات يحمي راسو فرق الاشهار على وسائل الاعلام. بغى يشري سكوتهم. طبعا ف”كود” رفضنا نقبلو اشهارهم.
السي فيكرات وادارتو دارت من سنوات استراتيجية فهاد الشي. اتفاقيات شراكة سنوية مع شي وحدين. طبعا باش ما ينتاقد حد السي فيكرات ولا اللي معاه.
حتى شي برلمانيين ضاربين الطم حقاش كيستافدو من قروض لضيعاتهم.
هاد البنك خاصو بونظيف. خاصو يرجع يخدم الفلاحة الصغار. اليوم نساهم وما مسوقش ليهم. خدام مع لكبار. شووفو غير التحولات اللي واقعة لكبار مدراء ديالو باش تعرفو فين غادي.
حضورو لانطلاقة الموسم الفلاحي كانت سبة لهاد الفلاحة. كان دعم للكبار اللي كيكبرو سنة بعد سنة
